Gula 36
Igo lang nakasulod si Megan sa lawak, mibagting ang telepono diha sa sala. Walay laing tawo diha sa sala gawas kang Jody mao nga siya ang mitubag sa telepono. Apan nakugang siya. Tingog ni Randy ang iyang nadungog didto sa telepono.
“Jody, please,” daw nagpakiluoy si Randy. “Ayaw kini’g buhata kanako. Sakit kaayo kini alang kanako.”
“Kun tinuod kang nahigugma nako,” ni Jody pa. “Ayaw na ko’g samoka. Hatagi ko sa akong kagawasan.”
“Unsa bay sala nga akong nahimo nga kalit man kaayo ang imong pagpakigbulag kanako?”
“Wala kay sala nga nahimo, Randy. Apan may bugt-at nga katarongan kun nganong ako kining gihimo.”
“Unsa ang maong katarongan?”
“Dili na kinahanglang masayod ka pa.”
Nasigpatan ni Jody nga migawas si Mr. Garcia gikan sa lawak niini. Kalit lang mikupog kaniya ang labok sa kakulba.
“Sige na, Randy.” Hagawhaw ang tingog ni Jody. “B-bye...”
Ug gidali-dali niya pagbutang ang awditibo sa telepono.
“Kinsa kadtong nanawag? Pangutana ni Mr. Garcia nga nanighawak nga miduol kaniya. -- Sumpayan pa