Walay kamatayon ang gugma

Gula 33

Nagpadayon ang panagsulti nila ni Jody ug Randy sa telepono. Gipadaplin na nila si Megan sa ilang hilisgotan. Nakahisgot si Randy kaniya mahitungod sa iyang Daddy. Gitug-anan ni Jody ang hinigugma nga wala sila’y problema mahitungod sa iyang amahan kay wala kini pagsupak sa ilang relasyon.

Gitug-anan usab ni Jody si Randy mahitungod sa promosyon nga iyang nadawat sa ilang buhatan sa Silver Star Daily. Gipahalipayan siya sa ulitawo. Misugyot kadto si Randy nga magkita sila unyang hapon apan mibalibad siya.

“Sa sunod na lang, ha,” paraygon ang tingog ni Jody. “Daghan ko’g buhaton karon. Please...”

“Okey,” matud ni Randy. “Ikaw ang mag-igo, Sweetheart.”

“Bye,” ni Jody.

“Bye,” tubag ni Randy. “I love you.”

“I love you, too.”

Ug gibutang na nila ang telepono.

Sa pagpauli ni Jody sa ilang pinuy-anan nianang sayong kagabhion, naabtan niya ang iyang amahan nga naglingkod sa sopa sa sala.

“Maayo kay ania ka na, Hija,” nagkanayon si Mr. Luis Garcia. “May mahinungdanon kitang panagsultihan.” -- Sumpayan pa