Nalusno si Don Panpilo

Tungod sa iyang pagka-ungo sa buwang, nabantog na karon si Ping sa ka-adunahan sa ilang dapit. Ang kaniadtong pobre nga Ping, karon pagatawgon na og Don Panpilo sa mga tawo, labina sa mga masyador sa buwangan. Kaniadto malipay na si Ping kun makaloklok la'g sengkwenta pesos nga maoy iyang madaog gikan sa iyang pagpanigbakay. Pero karon, magkabiba na siya og bitbit sa atache case nga maoy sudlan sa iyang daog sa pamuwang.

Bisan asang buwangana basta adunay tari dili masipyat ang panagway ni Don Panpilo sulod sa maong eskuylahan. Malipay usab ang mga nagdumala sa mga buwangan nga iyang masudlan kay usa man kini sa dakong puntos nga modawat og mga dagkong deperensya sa pusta o parada. Nagsugod og kausab ang kahimtang ni Ping sa dihang gitugahan siyag tangil sa pamuwang. Sukad nakabaton siya sa maong gahom wa na katilaw og pildi ang karaho. Ma-hackfight o derby perming dagkong ngisi ang molakra sa iyang nawong.

"O, dia pay deperensiya sa inilog!" sa masyador sa buwangan nga gihinganla'g Tommy. Didto kini nipuntarya sa gilingkoran ni Don Panpilo.

"Don Panpilo, ikaw?" sukna sa masyador.

"Pilay deperensya?" ni Don Panpilo sa masyador.

"Gamay ra ...kenyentos-mil ra.." sa masyador nga nagsinyas-sinyas sa mga tudlo.

"Sige ... larga!" ni Don Panpilo nga ni thumbs up sign sa iyang kumagko ngadto sa masyador.

Gibuhian dayon ang duha ka manok taliwala sa ruydahan. Ug sama sa naandan gamit ang iyang tangil, ang kontra sa iyang gipustaan nag untol-untol lang kini sa hinay nga mora og gitakigan. Ug yano na lang kining gikuniskunis ug bunal sa manok nga iyang gipustaan.

Grabi na gyud ang pagdato ni Don Panpilo. Kaniadto nga usa ra ka buok purol ang ibalikbalik niya'g sul-ob, karon kompleto na kini sa tanan niyang gikinahanglan. Apan nagdagan ang panahon nadugangan ang bisyo ni Don Panpilo. Kaniadto, sa buwang lang siya nabuang, pero karon haska nang dukiroka sa mga babaye nga binayran niya sa iyang sapi. Halos kada adlaw na siyang modimdim og nagkalain-laing babaye. Ug kay daghan lagi'g kwarta, bisan mahalong babaye iya gyud kining apason ang presyo, lamang, makatilaw na usab siya og lahi nga putahi. Daw nasusama na si Don Panpilo sa sikat kaayong golf player nga si Tiger Woods, nga na-addicted sa sex o pakighilawas sa lain-laing babaye ... haska na gyung butakala.

Ug niabot ang panahon nga bisan gamay wa gyud niya dahoma. Sa iyang ka-higal sa mga babayeng binayran, nasakit siya sa sakit nga wa nay kaayuhan. Sakit nga AIDS. Karon, nanglipaghong ang nawong ni Don Panpilo nga wala nay gawasgawas sa dako niyang panimalay. Gidid-an na siya sa doktor nga makig-halubilo sa laing mga tawo kay basin unyag matakdan sa iyang sakit. Sa laktod, dili ug dili na gyud siya pwedeng makagawas sa iyang balay.

Usa ka adlaw, may special forum derby sa mga banggiitang mga derbeyista nga ipahigayon sa suki niyang buwangan. Gipasiugdahan kini nilang Jose Sael ug Jun Bongo isip mga promoter sa maong derby. Nag-alindasay si Don Panpilo. Dili gyud niya maagwanta.

Gimingaw na gyud siya sa iyang eskuylahan nga mao ang buwangan. Sekreto siyang nigawas sa iyang balay nga way usang nakabantay ug sa suking Gallera ang iyang puntarya, diin didto ipahigayon ang maong special derby.

Apan pag-abot niya paingon sa pultahan sa buwangan ni-alibwag ang mga tawo nga mora'g nakakita og abat. May nagdangadanga nga tambokong lalaki nga nagsyagit ngadto sa babaye nga maoy nagbantay sa gate. "Dayyy...! ayaw....! ayaw intawon pasudla si Don Panpilo...!!!" sa tambokong lalaki. "Yaw intawon pasudla dayyy ... ayawwww ... kay kuyaw'g matagdan ta ... gi-ADIS... na na si Don Panpilo way lipodlipod nga syagit sa tambokong lalaki nga mao diay sinaligan sa maong buwangan.

Daw sa nalusno si Don Panpilo sa iyang nabati. Sa iyang kauwaw, dali kining nibalik sa sakyanan aron nalang mopauli. Didto sulod sa iyang sakyanan, nibati siyag kaanogon nga nagkomkom sa tangil nga giputos niyag panyo. Nakapanakla siya, kay dili ug dili naman niya mapahimuslan ang iyang tangil nga maoy nakapadato niya, kay dili naman siya pasudlon sa mga buwangan tungod sa iyang sakit nga wa nay kaayuhan. (Kataposan)