Kasinatian

Gula 1

Paspas ang paglakaw ni Berting paingon sa suki niya nga Sanciangko’s Wildflower kay adto siya magpalabay sa oras niining gabhiona.

Apan nadapit ang iyang pagtagad tungod sa usa ka seksi kaayo nga nagbarug sa eskena Sanciangko ug Pelaez. Mipahiyom si Berting ngadto sa babaye, nga nahulagway niya nga gwapa kaayo’g panagway.

“Naghuwat ka’g kasakyan? Parahan tika og taksi,” tanyag ni Berting ngadto sa babaye, nga igo lang mipahiyom kaniya.

Gigamit dayon ni Berting ang iyang pagkaabtik sa babaye. Gitunol niya ang tuo niyang kamot ug gitug-anan sa iyang ngalan ang babaye.

“Ako si Marie,” mubo nga tubag sa babaye dungan sa pagdawat sa kamot ni Berting. Nasangit g’yud si Berting ug nalangan ang pag-adto niya sa Sanciangko’s Wildflower sa unahan nga bahin.

“Asa ka diay paingon,” gisukna ni Marie si Berting kinsa abtik nga mitug-an nga paingon siya sa duol nga bar. Giagni ni Berting si Marie nga maglingaw-lingaw usa sila pinaagi sa pagkanta-kanta sa bar.

Pwerteng lipaya ni Berting kay wala siya balibari ni Marie ug mikuyog kini kaniya sa bar. Miorder dayon si Berting og usa ka botelya nga beer, samtang juice drink ang gi-order ni Marie.

Misugod dayon si Berting sa paghapyod-hapyod sa kamot ni Marie samtang nagpaabot sila sa ilang gi-request nga mga kanta. Una nga mikanta si Marie ug nakadayeg kaayo si Berting kay pwerteng ayoha mokanta ni Marie sa mga kanta ni Regine Velasquez.

Apan gidayeg usab kaayo si Berting ni Marie dihang iya nang gikanta ang Make Believe ug Wildflower. Nahimo sila nga “center of attraction” kay sundog kaayo nila ang Endless Love nilang Dianna Ross ug Lionel Ritchie.

Hinay-hinay nga mibai-id si Marie kang Berting. Gigakos ni Berting si Marie ug gihagkan. Buot unta ni Berting nga hiramon ang kalawasan ni Marie, apan giingnan siya sa babaye “Ayaw dinhi, manglakaw na ta.”

Nakamatngon si Berting nga mora’g mosugot si Marie sa iyang nahuna-hunaan nga dad-on niya kini og motel. “Andam ka ba nga mouban nako karon?,” sukna ni Berting, apan wala siya tubaga ni Marie.

Mipara dayon si Berting og taksi ug giingnan ang drayber nga adto sila sa Gem’s Court. Naghinam-hinam kaayo si Berting ug daw wala makatoo nganong paspas kaayo ang pagkilab sa panahon.

Pag-abot nila sa motel, gisugdan dayon ni Berting ang pagromansa ni Marie. Dayon gitagsa-tagsa paghukas ang gisul-ob niining sapot, apan misiga ang iyang mga mata sa iyang nakita. (Sumpayan pa)