Walay kamatayon ang gugma

Gula 32

“May daotan ba gud niana?” ni Randy. “Mas maayo man sab tingali nga makigsuod ko sa imong igsuon aron masinati sab nako ang iyang kinaiya.”

“Bitaw,” ni Jody. “Anaa ra kana kanimo.”

“Hello,” ni Randy nga ingon sa nakatugkad sa laing sabaw ni Jody. “Mora man og lain og sinultihan ang akong sweetheart karon. Nagselos ka ba?”

Wala motingog si Jody.

“O, c’mon, Sweetheart,” alam-alam ni Randy kaniya. “Ayaw hatagi’g laing kahulogan ang pagbisita ni Megan kanako. Hinigala lang ang pag-ila ko kaniya. Girespetohan ko siya isip imong manghod. Dili ko buot nga siya pa ang mahimong hinungdan sa kagubot sa atong relasyon.”

“I-I’m sorry, Sweetheart,” maguwang lang sa hagawhaw ang tingog ni Jody. Mibati siya’g kaulaw ngadto ni Randy.

“It’s okey,” ni Randy pa usab. “Kun gusto ka, likayan na nako si Megan.”

“No,” ni Jody. “Dili na kinahanglang buhaton mo kana. Kuan....nakalitan lang ko sa imong gisulti kaganina. Mora man gud og kadali ra kaayo mong nagkasuod. P-pero...m-maayo hinuon nga nagkasuod na kamo.” -- Sumpayan pa