Unang pag-inom ko og makahubog

Tuig 1963 kadto ug kuwarto grado ko ning tuiga sa Tejero Elementary School ning dakbayan.

Onse anyos ang akong edad. Kada alas-dos gyod to sa hapon, motumod to si Tansyang og tagutlo ka galong tuba kang Mama Fausta kay moinom man ang naulahi samtang mag-estoryahanay sila og ang iyang mga kumare nga silingan ra sab namo diha sa Lopez Jaena duol sa Parian ning dakbayan.

Binlan sab to ni Mama og tagsa ka galong tuba si Papa Esper kay moinom man sad ang naulahi inig-abot niya magabii gikan sa trabaho sa pier kon pantalan isip kapatas sa arrastre sama sa mga kargamentong asin, botelya, semento ug mga softdrinks.

Pilay estorya, gipanid-an to nako usa ka hapon niana sila si Mama ug ang iyang mga kumareng mga silingan.

Wala toy klase kay adlaw man tong Sabado. Hasi ug malipayon kaayo ang ilang estorya. Namula na ang ilang mga agtang ug nawong.

Taud-taod nanglakaw sila kay mamalit lagi og bugas humay nga Naric. Pagpanglakaw nila, nahibilin ko sa among balay. Misulay kog inom sa tuba ug gitilawan ko gyod.

Tam-is tam-is man og may pagkaisog ug aplod-aplod sa akong pagtilaw. Giganahan ko. Sige na kog ipis sa baso hangtod nga morag nagtuyok na ang among balay.

Nalipong ug naluya ko kay hubog na. Buntag sayo na kong nakamata. Nagsigi diay kog suka sulti pa ni Mama kanako ug nabatyagan nako nga may dahon sa atis nga hinawob nga gibutang sa gamay’ng kamisin ug gibugkos dapit sa baba sa akong atay.

Dili gyod ko makalimot sa unang higayon sa pag-inom ko og tuba nga makahubog kun palab-anan. (Kataposan)