Gula 29
“Nangita nimo si Mr. Beltran,” matud ni Jasmine.
“Ngano man kuno?” Usisa ni Jody.
“Ambot lang,” maoy tubag. “ Basta kay paadtoon ka kuno sa iyang office kun mahiabot ka na.”
Wala motingog si Jody. Nakasukot siya sa iyang kaugalingon kun unsa kaha ang tuyo sa ilang editor-in-chief kaniya.
“Adtoa lang,” sugyot ni Jasmine. “Aron atong masayran.”
Tuod man, miadto si Jody sa buhatan ni Mr. Isagani Beltran. Iyang naabtan ang lagas nga nag-atubang sa computer. Milingi kini sa pagkamatikod sa iyang pagsulod. Nangatahoran siya. Gisenyasan siya niini sa paglingkod.
“Nangita ka man kuno nako, Sir?” Sukit gilayon ni Jody dihang nakapahimutang na siya sa lingkoranan.
“Yes,” sa editor pa. “Mahinungdanon kaayo ang akong tuyo nimo.”
“U-unsa man kana, Sir?” Pakitubod ni Jody.
“Mo-resign na si Jenna Incon,” matud sa lagas, “ang atong opinion editor. Gipetisyonan na man gud siya sa iyang banang doktor nga atoa magtrabaho sa Amerika. Moapas kuno siya sa iyang bana didto sa States.”
“Mao ba, Sir?”
“Oo. Ug ikaw ang nahunahunaan ko nga maoy mopuli sa mabiyaan niyang puwesto.
“U-unsa?” --Sumpayan pa