Samtang pasakay si Ronie sa bus paingun sa Alcoy para mobisita ang iyang igsuon nga nasakit og cancer, gara kaayo nga nagpa-sound sa iyang mahalon nga mp3. Nindot ang iyang pamorma hitsuraan ug tanan nga tawo nga padung pa lang mosakay sa bus iya kining timbayaon para lang makit-an ang iyang mga mahalon nga gamit ug bag-ong mga kahimanan nga anaa siya nga puros gikan sa China.
Langas kaayo si Ronie sige’g tindog-tindog para lang gyud matimbaya sa uban pang mga pasahero nga wala niya matimbaya. Hilas kaayong nagbutang sa iyang duha ka dunggan sa headset, langas ang iyang ulo, siguro sa ka nindot sa iyang nabati nga musika nga maoy naka ingun nga mairita ang ubang mga pasahero.
Pero wala lang kini panumbalinga sa mga pasahero kay dili sila ka buot kung unsa ang buhaton sa tawo hilabi na nga wala sila makaila niini. Mokalit kanta si Ronie nga kusog ug lanog kaayo nga tingog, tungod sa kakusog sa iyang musika sa iyang mp3 nga siya ray makadungog. Usa sad ni nga maka-irita sa mga pasahero pero wala sila’y mabuhat kay perti jud lipaya ni Ronie sa iyang gibuhat, lupig pay tag-iya sa sakyanan ang ukoy.
Nilabay ang usa ka oras na-lowbat ang mp3 ni Ronie ug mao say paghunong sa bus para magpagasolina.
“Kanang manaog sa Dalaguet, Argao ug Alcoy hinay-hinay lang mo’g plete,” matud sa konduktor apan wala kini panumbalinga ni Ronie.
“Ah kalayo pa atong Alcoy,” hilum nga bagotbot ni Ronie”. Hapit na muabot si Ronie, naka disisyon na siya nga moplete, ug sa dihang pagkuot niya sa iyang lawom nga bulsa, wala na iyang pitaka ug wala na siya’y kwarta para ikaplete. Gisingot og bug-bug ang nawong ni Ronie naglibog siya unsa iyang buhaton.
“Patay jud ko ani unsa akong buhaton,” hagawhaw ni Ronie sa iyang kaugalingon nga naminghoy.
Gidu-ol ug gikablet siya sa konduktor , Brad plete nimo,” naglibog si Ronie unsa iyang itubag.
Baaaaiiii waaalaaaa koooy kwaaarrrtaaaa.
“ Ha wala kay kwarta? Kahilas nimu ganiha pa-feeling datu pa ka unya karon wala kay para plete, karaan na na nga estilo doh,” kusog nga yaw-yaw sa konduktor.
Wala makamatikod si Ronie nga nitulo iyang mga luha sa kauwaw kay tanang mga pasahero nagtan-aw niya. (Katapusan)