Anino sa adlaw

Gula 8

Samtang nagpadayon pagdagan ang motorsiklo nga gisakyan ni Ricky, mipaka ang mga buto-buto gikan sa iyang luyo.

Gihanginhanginan gayod ang mga dalunggan ni Ricky sa nagpungasing mga bala nga gitira sa mga nagsakay sa sakyanan nga nagsunod kaniya. Gilubag og maayo ni Ricky ang gasolinador sa motorsiklo ug daw naghapa siya nga mipadayon pagpadagan niini.

Pag-abot niya sa usa ka eskina, miliko siya. Unya pag-abot niya sa laing eskina, miliko na usab siya. Makadaghan siya maglikoliko sa lainlaing mga eskina hangtod nga wala na gayod siya masundi sa mga tawo nga buot mopatay kaniya.

Nakaginhawa’g luag si Ricky. Abi niya’g mao na kadtoy iyang kataposan. Salamat nga nakalikay pa siya sa mga tawong nagtinguha’g daotan kaniya. Apan wala siya mokompiyansa. Tingalig gipanid-an pa siya sa mga tawo nga migukod kaniya.

Dihang natino nga wala nay kuydawo, milahos na si Ricky ngadto sa ilang pinuy-anan. Hapit na ang ala-una sa kaadlawon sa iyang pag-abot sa ilang balay. Wala na lang niya tugawa ang iyang mga ginikanan nga nahinanok na pag-ayo. Nakasulod siya sa balay sa dakong kasayon kay may duplicate man siya sa yawe sa pultahan. -- Sumpayan pa