Gula 4
“Ayaw pabawoni’g kasubo kining akong paggikan paingon sa bukid, Manoy,” nagkanayon si Ronald. “Pabawoni ko’g kalig-on aron ako makasugakod pagtuman sa kawsa nga alang sa masa -- alang sa kinabag-an sa katawhan.”
Kun ang akong pagbuot lang ang masunod,” ni Ricky pa. “Dili gyud unta ko mosugot nga magpabukid ka. I can imagine kun unsa ka lisod ang inyong kahimtang didto sa bukid. Pero nakasabot ko’s imong baroganan. Padayon. Ug good luck.”
“Salamat, Manoy.”
Nagpanamilitay sila sa usa’g-usa. Human sa ilang panagsulti, kalit lang nahanaw si Ronald nga misuot sa kangitngit.
Milakaw si Ricky paingon sa nahimutangan sa iyang motorsiklo dihang nahanaw na si Ronald sa iyang panan-aw nga gilamoy sa kangitngit. Miangkas dayon siya ug gipaandar ang makina sa motorsiklo. Unya mipahugong siya pagdagan niini.
Samtang nagdagan ang motorsiklo nga gipangunayan niya pagmaneho, maoy iyang gihunahuna ang nahitabo sa panagkita nila ni Ronald. Nahasol siya sa desisyon sa iyang manghod. Labaw niyang gikabalak-an kun unsaon niya pagpasabot ang ilang mga ginikanan mahitungod sa pagpabukid ni Ronald. -- Sumpayan pa