Anino sa adlaw

Gula 2

Dihang nakita na ni Ronald nga migawas ang iyang Manoy Ricky sa sibyaanan sa radyo, midali siya paglabang sa karsada ug iya kining gisugat. Daw nakugang si Ricky pagkakita kaniya. Daw wala kini magdahom nga nahiuli na siya sa ilang lungsod. Tingklase pa man gud. Adlaw pa lang nga Miyerkules ug sa naandan, atua pa siya sa siyudad niarong mga adlawa ug sa Sabado pa unta siya mopauli sa ilang lungsod.

“Nganong nahiuli ka na man?” Gisugat siya’g pangutana sa maguwang. “Wa na diay moy klase?”

“Aduna man,” laktod niyang tubag. “Pero ako ang dili na moklase, Manoy.”

“U-unsay buot mong ipasabot?”

Wala dayon motingog si Ronald. Ingon sa nagtigom siya’g igong kalig-on pagpadayag sa buot niyang isulti. Paglabay sa mga gutling, namulong na siya.

“Pasayloa ko, Manoy,” ni Ronald pa. “Dili na ko mopadayon pag-eskuyla. Nakahukom kong magpabukid na sa hingpit.”

Namatikdan ni Ronald Liwanag nga ingon sa nakalitan ang iyang Manoy Ricky sa iyang gipadayag. Daw wala kini magdahom sa gipakanaog niyang desisyon.

“Magrebelde ka na gyud?” Sukit ni Ricky. -- Sumpayan pa