Walay kamatayon ang gugma

Gula 19

“Biyaan ko una kamo, Sis, ha,” nananghid si Megan dihang nakalingkod na siya. “Aron magkasulti kamo’g maayo niining imong prince charming.”

Dayon mitindog si Megan ug milakaw paingon sa lawak niini. Apan nagbilin kini’g pilit kaayong tinan-awan ngadto ni Randy.

“Pilya man diay kaayo ang imong manghod,” nagkanayon si Randy. “Tabian siya kaayo. Lahi nimo nga maghilom-hilom lang.

“Tinuod kana,” niya pa. “Managlahi kami’g kinaiya bisan kun managsuon kami. Misamot na tungod kay dili man tibuok ang among pagka-managsuon.”

“U-unsay buot mong ipasabot?” Mikunot ang agtang ni Randy nga misukna kaniya.

“Half sister ko lang siya,” mipasabot si Jody. “Managsuon lang kami sa amahan. Anak ako ni Daddy sa laing babaye, sa iya pang pagka-ulitawo. Si Megan anak sa akong amahan sa babaye nga maoy iyang gipakaslan.”

“I see,” ni Randy.

“Nganong siya na man ang nakigsulti nimo kaganina?” Mipalain si Jody. “Gibiyaan ka lang diay ni Daddy dinhi?”-- Sumpayan pa