Walay kamatayon ang gugma

 Gula 17

“Ma-maayong gabii, Sir,” nangatahoran si Randy.

“Maayong gabii usab,” tubag sa amahan ni Jody dungan ang pagpalong niini sa telebisyon pinaagi sa remote control.

Daklit nga nagkasugat ang mga tinan-awan nila ni Jody ug Mr. Garcia. Mapangutan-on ang tinan-awan niini kaniya. Nakaagpas si Jody kun unsay diha sa hunahuna sa iyang daddy.

“D-Dad,” ni Jody pa sa tingog nga mihana pagkurog. “S-siya si Randy Maglana.”

Gitan-aw ni Mr. Garcia ang ulitawo. Gitutokan niya kini’g maayo. Unya miyangoyango kini.

“Randy,” gisangpit ni Jody ang hinigugma. “Siya ang akong daddy, Sir Mr. Luis Garcia.”

“Kumosta, Sir?” ni Randy dungan ang pagtunol sa binukhad niining palad ngadto sa amahan ni Jody.

“Maayo man, Hijo,” ni Mr. Garcia pa nga nakiglamano kang Randy. “Lingkod.”

Mora’g nakaginhawag luag sa hilom si Jody. Nakapasalamat siya nga wala motukar ang sapot sa iyang amahan ug maayo kining mitagad kang Randy.

Nanglingkod sila sa sopa. Nagtupad sila si Jody ug Randy sa taas nga sopa nga atbang sa gilingkoran ni Mr. Garcia. -- Sumpayan pa