Walay kamatayon ang gugma

“Glad to meet you, too,” ni Megan pa usab.

Namatikdan ni Jody nga pilit kaayo’g tinan-awan si Megan ngadto kang Randy samtang naglamanohay sila.

Dili buot si Jody nga maghunahuna og daotan sa iyang nasaksihan. Apan nasuheto siya sa kinaiya sa iyang igsuon. Sa gipakitang lihok niini, nasabot gilayon niya nga nadani ang iyang manghod kang Randy.

Taudtaod na ang pagpig-itay sa kamot nila ni Megan ug Randy, apan wala pa gayod buhii sa dalaga ang kamot sa ulitawo. Gilainan na sa hilom si Jody sa iyang nakita.

“R-Randy,” gisangpit niya ang hinigugma. “Mosulod na kita sa balay aron imong mahimamat si Daddy.”

“Ayaw una, Sis,” ni Megan pa. “Magsultihanay una mi si Randy.”

“Sa sunod na lang, Sis,” ni Jody. “Ipaila ko una siya kang Daddy. Ayaw kabalaka. Sukad karon, magkanunayan na si Randy dinhi sa ato. Seguradong magkasultihanay kamo’g maayo sa sunod higayon.”

Walay nahimo si Megan. Mipadayon sila si Jody ug Randy pagsulod sa balay.

Ilang natukmaan si Mr. Luis Garcia nga naglingkod sa sopa sa sala. Ang pagtagad niini didto ra sa gitan-aw nga salida sa telebisyon. Apan mihinay kini’g lingi dihang gisangpit ni Jody. Daw nakugang kini pagkakita kaniya nga may kuyog nga lalaki. Misaog na usab sa dughan ni Jody ang kakulba. Nabalaka siya nga tingalig masuko kini kaniya. -- Sumpayan pa