Manok sa ungo giapil sa tigbakay

Hapit na mahurot-hurot ang mga hiniktan ni Sadoy kay kanunay lang siyang hibun-an sa higayon nga manari siya didto sa tigbakayan sa sityo Tabok o di ba didto sa buwangan sa lungsod.

Naghukdong karon si Sadoy diha sa pasamano sa ilang pantawan. Gibati man gud siya’g kaguol kay tiaw bay dako na kaayo siya’g pildi ug sigehan na gani siya’g away sa iyang asawa.

Kini pud si Minyang nga iyang asawa hawod ka kutibkutiban ug dili ra ba gyud maminaw sa higayon nga mopasabot si Sadoy kaniya.

Gikan sa sayong hapon ug hangtod na sa gabii ang tagawtaw ni Minyang ngadtong Sadoy. Si Sadoy, kay medyo may pagka-anderdisaya igo na lang molakaw ug mobalik lang kini dala sa iyang mga manok nga igtatari kanang mangatulog na sila si Minyang ug ang duha niya ka mga anak.

Kun wala pa lang siya magpugong tingali iya na sige kulatahon taman sa ginhawa kining iyang kuwanggulon nga asawa.

“Hoy, Sadoy, manari ka pa gani’g usab ug unya mouli ka lang nga huyhoy ang abaga, pamatyon ko nang tanan mong mga hiniktan!” bahad ni Minyang kang Sadoy. “Wa ka na lay laing giatiman kundili kana ra gyung imong mga hiniktan!”

Mao gyud kini si Minyang, makabuno o dili makabuno ang iyang mga hiniktan nga igtatari, motagawtaw dayon kini ug lanog ra ba kaayo ug makadungog gyud ang mga silingan kay dili ra man layo ang mga balay nila. Eskandalosa, bastos ug dili mauwaw maggahot kining iyang asawa bisan duna pay maminaw nga mga tawo.

Ning hapona karon may bisita siya, si Paco. Kini si Paco usa sa mga barkada niya kaniadto. Apan dihang gidungogdungog ang mga ginikanan niini nga mga mangtas nga ungo, iya na kining gilikayan ug hasta pud ang uban niyang mga barkada maglikay na kang Paco. Tingali, nakasabot wala na usab makighugoyhugoy kanila si Paco, naglikay na usab.

Apan karong buntaga nia si Paco nagdalag manok nga hiniktan ug sa tan-aw ni Sadoy mora’g nindot kaayo nga pagka-hiniktan ug may kolor sa balhibo nga talisayon.

“Imo na ni, bay Sadoy. Mamalhin pa man gud mi’g puyo,” ni Paco pa nga midunol sa manok nga talisayon. “Makatabang kaayo ni nimo...”

Ug kay mahiligon si Sadoy sa manok labi na’g hiniktan, maong iya dayon kining gidawat. Unya, wala magdugay si Paco, milakaw kini human makapananghid. Tuod, dihang gitari ni Sadoy ang manok ni Paco didto sa tigbakay sa Tabok, nakabuno kini ug wala pa gani tuyo o samad ang manok nga talisayon.

“Beliba nako’g labok sa imong manok, bay Sadoy, uy,” ni Osyot pa nga sugarol usab nga magpitokpitok ang mga mata kun motabi. “Magpaliwat unya ko ana...”

Miyango si Sadoy. Unya, iya na usab nga gitari ang manok sa gidungogdungog nga ungo nga si Paco. Halos, kada dunay tari dili gyud masipyat ang manok nga talisayon, makabuno gyud kini. Dihang iya kining giapil sa Derby midaog gihapon.

Tungod niini, hinayhinay usab nga miusab ang pagpuyo ni Sadoy ug ang iyang asawa nga si Minyang mao lang gihapon, kitib lang ang baba. Kasab-an gihapon si Sadoy bisan sa daghang tawo.

Unya, usa ka hapon miabot si Paco aron kuhaon ang manok. Dili unta mosugot si Sadoy apan wala siya’y mahimo kay si Paco ang tag-iya. Unya, may gitayhop si Paco sa tangkugo ni Sadoy ug nianang pagka-gabii, nagwakwak na si Sadoy kuyog sa iyang asawa nga nahimo na usab nga ungo. Silang magtiayon manglupad na panahon sa gabii biniyaan ang ilang duha ka anak nga nangatulog na. (Kataposan)