Gula 15
“Naa na kaha karon ang imong daddy?” Pangutana ni Randy.
“Naa na tingali,” maoy iyang tubag. “Sagad mga 4:30 nia na siya sa balay.”
Milakang si Jody paduol sa gate nga puthaw. Misunod kaniya si Randy. Gikuha niya ang pungpong sa mga yawe gikan sa iyang shoulder bag ug ang usa niini iyang gipasok sa yawehanan sa gate. Naabli ang gate nga puthaw.
Sa dihang nakasulod na sila sa gate, mitagbo kanila si Megan.
“Kinsa man kining guwapo nga imong kuyog, Sis?” Nagkanayon si Megan.
Wala dayon makatubag si Jody sa pangutana. Nakalitan siya. Wala man gud siya magdahom nga si Megan maoy motagbo karon kanila.
Gipaila ni Jody si Randy ngadto kang Megan.
“Siya si Randy,” nagkanayon si Jody. “Randy Maglana.”
“Wow,” ni Megan pa. “Nindot nga ngalan. Haom kaayo sa iyang kaambong.
“R-Randy,” gitan-aw ni Jody ang hinigugma aron ipaila ni Megan. “Siya si Megan, akong sister.”
“Kumosta ka, Randy?” Ni Megan nga mitunol sa binukhad niining kamot ngadto sa lalaki alang sa pakiglamano.
“Maayo man,” ni Randy nga midawat sa kamot ni Megan. “Glad to meet you.” -- Sumpayan pa