Gula 14
Wala motingog si Jody.
“Ihatod ko na ba ikaw sa inyo?” Laing pangutana ang gipasupot ni Randy.
“I-ikaw ang mag-igo,” ni Jody pa nga ang hunahuna gikapyotan sa tumang kabalaka.
Wala sila maglangan. Namaingon sila sa nahimutangan sa sakyanan ni Randy sa parking lot sa Ayala Center Cebu. Dihang nakapahimutang na sila, gipaandar gilayon ni Randy ang makina sa sakyanan.
Samtang nagsubay na ang sakyanan nga gimaneho ni Randy sa dalan nga paingon sa ilang pinuy-anan, ang kabalaka misamot pagtaob sa kahiladman ni Jody. Nabalaka siya sa posibleng reaksiyon sa iyang amahan sa higayon nga makita siya niini nga may kuyog nga lalaki.
Apan namahala na lang ang iyang hunahuna. Giandam na lang niya ang iyang kaugalingon sa pag-atubang sa kamatuoran. Gihigugma ug gimahal niya si Randy. Kun unsa man ugaling ang buhaton sa iyang daddy ngadto niini, panalipdan niya kini. Bahala na’g unsay mahitabo.
Miurong ang awto nga ilang gisakyan atubangan sa gate nga puthaw sa dakong balay nga luho kaayo’g pamayhon. Unang mikanaog si Randy ug giablihan niini ang pultahan sa tuong kilid sa sakyanan. Nanguros una si Jody sa wala pa mokanaog sa awto. Niining tungora, giyugyog na sa naghuro-huro nga kakulba ang iyang dughan. -- Sumpayan pa