Lovers in Pari-an
Gula 108
Naglibog pag-ayo si Rosalinda. Wala siya masayod kun unsay angay niyang buhaton. Tumanan ba niya si Bongkoy sa gusto niini? Unsa man kaha usay buhaton ni Atty. Gumera kun masayod kini nga mikuyog siya kang Bongkoy? Dili kaha kini magsugo og mga polis sa pagpangita kanila aron dakpon sila ug ipabilanggo siya? Dako ra ba siya’g utang ngadto sa iyang agalon.
Ang iyang problema iyang gitug-an ngadto ni Tasing. Gisuginlan usab niya si Tasing mahitungod sa buot mahitabo ni Bongkoy.
“Kakuyaw nianang inyong pagabuhaton,” nakaingon si Tasing. “Tingalig masakpan mo ni Atorni.”
“Mao lagi, Nang,” matud ni Rosalinda. “Pero wala nay laing paagi nga nahunahunaan si Bongkoy aron makalingkawas kami ni Atty. Gumera.
“Husto sab hinuon si Bongkoy. Kun may bili pa alang kanimo ang iyang gugma, mosugot ka sa gusto niyang mahitabo. Nagkahigugmaay man kaha gyud kamo sa usa’g-usa.”
Ang panagsulti nila ni Tasing nakasamot hinuon sa kalibog ni Rosalinda. -- Sumpayan pa
- Latest
- Trending
