Bunga sa pag-antos

Gula 12

Gitubag dayon ni Dianne ang pagtawag kaniya ni Ricky, ang customer niya sa bar nga opisyal sa City Hall.

“Kumusta Dianne, imbitahon tika unyang gabii pwede? Dunay gamay’ng salo-salo diri sa balay, birthday nako karon,” matud ni Ricky.

“Uy mao ba, happy birthday Sir. Sure mutambong ko sa imong party pero wala lagi ko’y mahatag kanimo nga gift kay naproblema gani ko karon sa pampabayad sa akong matrikula sa tunghaan,” abtik nga tubag ni Dianne.

Tuod, pagka gabi gipakuha si Dianne sa drayber ni Ricky. Wala makatuo si Dianne kay pwerteng dakua sa mansion nga gisudlan sa kotse ug nagtuo na siya nga mao na kadto ang gipuy-an ni Ricky.

Si Ricky mismo ang misugat ug mibukas sa pultahan sa kotse. Naikog kaayo si Dianne kay nahisama siya og rayna nga gisugat ni Ricky samtang gitutokan sa mga bisita sa opisyal sa City Hall.

Didto g’yud siya gipatupad og lingkod ni Ricky kaniya sa dayon nang pagpangaon. Tungod sa kalipay nga giisip siya ni Ricky nga pinasidunggang bisita, giubanan niya si Ricky sa pagdimdim sa bino.

Ingon sa nalipong si Dianne sa iyang pag-inom. Gitanyagan siya ni Ricky nga mopahuway lang adto sa guest room ug mipaundayon lang usab si Dianne. Mibalik si Ricky pag-abi-abi sa iyang mga bisita. 

Pagpanglakaw na sa mga bisita, gibalik ni Ricky si Dianne sa guest room. Nagmata gihapon ang dalaga.

“Ok na ba ang imong pamati Dianne? Dia dawata kining gamay’ng tabang nako kanimo kay naproblema ka man kaha sa imong pangbayad sa matrikula sa tunghaan,” dayong tunol ni Ricky sa P10,000 kang Dianne.

Sa kalipay wala tuyoa nga nagakos ni Dianne si Ricky ug gihagkan. “Salamat kaayo Sir Ricky,” matud ni Dianne nga milunga na sa iyang paggakos sa hamtung niya nga kustomer.

Gitug-anan si Dianne ni Ricky nga usa na siya ka byudo. Namatay ang iyang asawa upat ka tuig na ang milabay.

“Pagbinuotan sa imong pagtungha Dianne, ako’y bahala sa imong mga gastohan. Undang na sa imong pagsayaw sa bar kay hatagan ko lang ikaw og imong panggasto kanunay,” matud ni Ricky.

Daw gaan kaayo ang pagtagad ni Dianne kang Ricky ug subli niya kini nga nagakos ug gihagkan na g’yud sa ngabil. Ning higayuna migakos na kaniya si Ricky ug mibawos sa pag-ukob sa ngabil sa dalaga.

Ang ilang paghinagkanay nakasugnib og dili matukib nga kainit sa masi’g nila ka kaugalingon hangtud nga nanghigda na sila sa kama samtang nagpadayon sa ilang romansa. (Sumpayan pa)