Gula 12
Maong kanunay lang niyang saad saaran si Randy. Apan wala siya magdahom nga nagtimaod diay kini sa iyang gisaad-- nga mahimo na kining magpaila ngadto sa iyang amahan kun motangkod nang usa ka tuig ang ilang relasyon.
“Unsa na, Sweetheart...?”
Gisikdo ni Randy ang iyang kahimungawong. Karon pa siya makaamgo nga taud-taod na diay siyang nahiunlod sa halawom nga pagpamalandong.
“Mosugot ka ba,” nagkanayon si Randy,” nga magpaila na ako ngadto sa imong daddy?”
“A-aw,” ni Jody pa. “Nga-nganong dili...”
“Good,” ni Randy pa.
“Pero may ihangyo lang ko nimo, Randy.”
“Unsa kana?”
“Ikaw nay maantigong mo-adjust sa kinaiya sa akong daddy. May pagka-estrikto ra ba siya.”
“Ayaw kabalaka. Maantigo kong mopauyon-uyon sa kinaiya sa tawo.”
Paglabay sa pipila ka daklit, nahuman ang ilang pangaon.
Migawas sila sa luhong kan-anan. Nagkasabot nga manan-aw og sine. Misulod dayon sila sa sinehan. Pelikulang English ang ilang gitan-aw. -- Sumpayan pa