Lovers in Pari-an

Gula 101

Ang tinuod, naibog si Rosalinda sa maong alahas. Nasayod siyang mahalon ang maong matang sa alahas. Dili siya makapalit sa ingon niining matang sa singsing sanglit wala man siya’y ikasarang. Pero nasayod siya nga may bugti ang maong alahas nga ihatag ni Atty. Gumera kun iya kining dawaton.

“Dawata na kini, Hija,” gikan na usab ni Atty. Gumera.

“D-dili lang ko, Atorni,” balibad ni Rosalinda. “U-ug salamat na lang kaayo.”

“Ngano bang mobalibad ka man?”

“W-wa man gud ko maanad sa pagsul-ob og alahas, Atorni.”

“Pwes, mag-anad-anad ka na. Kun maanad ka na unya, nakaseguro kong ganahan ka nang magsul-ob og alahas.”

Wala motingog si Rosalinda.

“Sige na Hija,” ni Atty. Gumera pa. “Dawata na kining maong singsing.”

Wala maggunok si Rosalinda.

“Dawata na kini, Hija, aron dili ako mahiubos kanimo.”

Ug wala na makatutol si Rosalinda dihang gigunitan sa abogado ang iyang kamot ug gisul-ob niini ang singsing sa iyang tudlo. -- Sumpayan pa