Gula 6
Apan gibalibaran ni Jody ang tanyag sa iyang amahan. Naikog siya kang Mr. Isagani Beltran, ang editor-in-chief sa Silver Star Daily. Si Mr. Beltran ang giisip niyang mentor sa journalism. Gawas nga editor, magtutudlo usab niya si Mr. Beltran sa iyang pagkuha sa kursong journalism sa usa ka unibersidad sa dakbayan sa Sugbo. Buotan nga editor ug magtutudlo si Mr. Beltran.
Maong dili niya katalikdan si Mr. Beltran. Nakasaad siya sa iyang kaugalingon nga samtang si Mr. Beltran pa ang editor sa Silver Star Daily, dili siya mobiya sa maong pamantalaan. Gawas pa, dili usab buot si Mr. Beltran nga mobiya siya sa Silver Star Daily. Tingali kuno’g gamiton niya ang tanan niyang nakat-onan gikan sa maong pamantalaan sa iyang pagdumala sa kaugalingon nilang publikasyon. Init ang kompetisyon sa Silver Star Daily ug sa Mozart Publications nga gipanag-iya sa iyang amahan. Sa maong sitwasyon, may mga higayon nga dili niya kalikayan ang maapiki sa conflict of interests sa duha ka habig. Lisod usahay alang kaniya ang pagpatunga sa sitwasyon. -- Sumpayan pa