Kaila mo nako...?

Kaila mo nako....?" Kini ang sagad litokon sa yanong mga lungsuranon sa nabantog nga lungsod nga nahimo nang dakbayan karon. Paborito sab kining panultihon agi'g pasiaw sa mga badlongon ngadto sa ilang suod nga kaila.

Nagsukad kining sinagoy nga pulong gikan sa tawong gipangita sa kapolisan sa dakbayan nga sumala sa saysay sa mga biktima mao kini ang ising-al sa gikatahapan matag mugna niya sa krimen nga maglambigit sa pamatay, pangidnap, panghulga ug uban pang salaod.

Wa masulbad ang panghitabo kay idlas lagi ang kriminal nga gikurugan halos tanang katawhan sa dakbayan. Ug tungod sa mga panaway ug panghimaraut sa kahanginan ug pamantalaan, ang talamdong Mayor kusganong mimando sa hepe sa kapolisan sa dakbayan nga dakpon gyud ang kriminal. Apan mora'g way epek ang kapolisan sa ilang tumong batok sa gikatahapan. Way mga saksi nga mobarug. Duna man gani'y nakasaksi sa hitabo, maikog motug-an kay sa suspetsado gitaho nga anak man sa hamiling ginikanan.

Ang Mayor sa dakbayan gitamud nga tigsangyaw sa pulong sa Ginoo ug dunay bugtong anak nga tigbitbit sab sa iyang Bibliya. Buotan ug ligdong siyang nangatungdanan. Way buling ang iyang ngalan. Apan natay-og pag-ayo ang iyang pamunoan gumikan sa krimen nga subsob mahitabo sa dakbayan.

Ubos sa kahadlok, panagsa na lang ang magtikawtikaw sa awaaw ug hilit nga mga dapit sa dakbayan gawas ning batan-ong babaye nga mag-short ug mag-inusara nga mag-jogging matag hapon. Hamis ang iyang paa ug dunay digital radio nga ibilikis sa tuo niyang bukton nga mora'g naminaw sa programa sa estasyon.

Samtang nag-jogging ang maong babaye usa ka hapon niana, mibutho ang gikatahapan nga nangatang sa may hilit nga dapit.

"Hehehe... chick mamords! Wa ka kaila nako? Ako ang hawak dinhi...!" Matud pa sa nagpanilap nga nangatang nga may pistola sa iyang kamot.

Naugnok ang babaye nga misibug diyutay ug pasumangil nga nahadlok. Kuptan na unta sa nangatang suspetsado ang babaye kay pahimudsan, kalit lang may mihagtik. Pak! Lagpot ang pistola sa suspetsado nga gitapi sa babaye dungan ang karate chop.

Nalup-og ang    suspetsado. Mihana siya pagtindog apan gisugat sa patid sa babaye. Lugapak ang tiyan sa suspetsado sa patid nga kusog pa sa kabayo.

Sa dihang usban na unta pagtindak sa babaye, nangaliyupo ang nag-utnga nga suspetsado: "Ayaw na 'tawon Ma'am.... pasayloa lang ko!"

"Sige, sukol pa...!" Hagit sa babaye nga nagpaminti sa kapungot. Nag-aguroy sa kasakit ang suspetsado. Ug una ipulseras ang posas, suk-anon nga miingon ang babaye:

"Kaila na ko nimo karon. Ikaw diay si Jason nga anak salbahis sa talahurong Mayor ning dakbayan. Anugon lang kay wa ka maliwat sa imong amahan. Hala, didto ipagara ang imong kabuang sulod sa bilanggoan."

Gihuslo sa babaye ang digital radio nga gibilikis sa iyang bukton ug dihadiha milanog dayon sa kahanginan ang balita sa maong hitabo. Kadtong babaye nga giatngan ni Jason kay lugoson unta mao diay si Carla nga freelance reporter ug Martials Arts instructress sa NBI Manila. Midalikyat siya pagtuyo sa dakbayan aron pagsikop sa lampingasan nga kriminal. (Katapusan)