Usa ka dupang uway

Lawom nang gabii. Samtang naglakaw ko pauli sa among balay may kotse nga misapipid kanako ug mihunong sa akong kiliran. "Bay, mahimo bang mangutana?" sukna sa lalakeng nagmaneho ngari kanako.

"Ngano 'gong dili?" ligdong kong tubag.

"Layo pa bang Sudtonggan?"

"Layo-layo pa, bay."

"Nakaila ka ba ni Ige Amistoso?"

"Nakaila mo lang! Gawas pa suod ko kaayo siyang higala."

"Nakatultol ka ba sa ilang balay?"

"Oo. Duol sa kapilya ang ila."

"Kining... Mister, kun dad-on ka namo, mosugot ka? Mosuhol lang 'mi nimo," timang sa babaye sa iyang tupad. "Maayo man 'god nga dunay kaubang suhito kay hapsay ang lakaw."

"Aw, oo." Ug mikiros ko pagsakay human ablihi sa lalake ang luyong bahin sa kotse.

Nagsugwak ang mga tawo sa baylihan sa among pag-abot. Hayag kaayo ang mga sugang dagitabnon ug nagdibal ang kabanha sa mga huni sa mayek. Piyesta diay sa Sudtonggan!

"Tana, Bay ... manayaw ta," agni sa lalake human niini iparada ang kotse.

"Kamo lang kay wa ko makailis. Maghulat lang ko ninyo dinhi sa kotse."

Miabli ang babaye sa iyang shoulder bag. Mikuha kini’g kuwarta ug gitunol kanako. Unya, nanglakaw ang duha paingon sa baylehan. Wala madugay...

"Mga higala, panahon na nga sugdan ang bangga sa tanggo," milanog ang tingog sa MC. "Ang mananalmot mao kining mosunod:" ug gipamasa ang talaan sa mga nangapil. Nahasiga ang akong mga mata kay naapil diay ang lalake ug babaye nga akong gikuyogan. Lahi sila sa tanan. Puno sa kinabuhi ang ilang pasundayag. Ang resulta, sila ang nakaangkon sa unang ganti.

Samtang nagasud-ong kanila gianod ako sa katulogon hangtod nga nahinanok nga nagtikubo sa hunol-hunol nga sandiganan sa drayber.

Maoy akong namat-an ang kasakit sa akong mga bukton ug ang kainit nga mikuyanap sa akong bukobuko. Wala na diay ako sulod sa kotse. Naglingkod na ako sa usa ka dakong bato ug nagtikubo sa mahait nga gaang. Taas na diay ang gintang sa adlaw gikan sa sidlakan kang kansang kainit mipagba sa akong bukobuko. Giliraw ko ang akong panan-aw sa palibot. Lunlon kalibonan ang naglikop kanako. Wala na ang kapilya. Wala na usab ang kabalayan. Ang kasibaw sa mayek nga kagabii labihan gayong lingogngoga tanan nangahanaw na usab ug gipulihan sa mga agulo sa kukok ug sa mga awit sa lasangnong kalanggaman.

Hain na man diay ang akong gikuyogan? Nakasukot ko sa akong kaugalingon. Unya, nahinumdom ko sa linikit nga kuwarta nga gitunol kanako ni Ma'am kagabii ug gisulod ko sa akong bulsa. Ako kining gikuot apan ang tanan nangahanaw. Mao na lamay nadala sa akong mga tudlo ang binubod nga usa ka dupang uway ug ang sulat nga gibuboran niini. Gibukhad ko ang sulat ug gibasa:

Bay, pinaagi ning uway mahimo kang milyonaryo. Ihumol kini sa tubig, ipainom ug idigo sa imong mga manok nga igtatari. Ang kutob sa mga manok nga imong mapainom ug madigo manaog gyod sa bulang. Ugma kay Domingo sayoa pagpainom ug pagdigo ang imong mga hiniktan ug dad-a sa bulangan aron itari. Makita mo unya ang katag. Imong abay, Fredmon.

Gituman ko ang mga pahimangno sa sulat. Wala gayo’y nakawang. Gidasondason ko sa mga tigbakay. Pulos gayod nanaog! (Kataposan)