Bunga sa pag-antos

Gula 3

Wala kaayo magdugay sila si Dianne ug PO2 Rutchel sa ilang pagpahulay kay hapit na ang tungang gabii.

Gikontak sa polis ang front desk sa motel ug giingnan ang nakatubag sa intercom nga mo-check out na sila. Nalipay kaayo si Dianne kay sa dayon na nilang kanaug paingon sa giparkingan sa gisakyan nilang motor, gitunolan siya ni Rutchel og P1,500.

Siya ra man god ang gisaligan sa panginabuhian sa ilang pamilya. Patay na ang iyang amahan ug walay trabaho ang iyang inahan ug igsoon.

May lain pa nga higayon nga nagkakuyog sila si Dianne ug si Rutchel, diin gihatagan gihapon siya og P1,000. Apan gikan niadto, wala na mokontak pa si Rutchel kaniya.

Nakahukom si Dianne nga mopadayon siya pag-eskwela aron tiwason ang kurso niya nga Commerce major in Banking. Naningkamot siya nga mo-duty gayud matag gabii isip dancer sa Sanciangko’s Wildflower.

Dili siya sama sa uban nga dayag kaayo magpagakos-gakos og mga lalaki nga ilang mahimong customers ug kini maoy nagustohan kaniya sa mga lalaki.

Nakapa-enroll g’yud si Dianne sa University of San Carlos (USC). Maayo lang sa sinugdanan kay madala pa niya ang panggasto kay mo-duty man siya pagka dancer sa gabii.

Uwaw gani siya kaayo kay diha’y higayon nga nakit-an siya sa usa niya ka instructor nga misulod niadtong gabhiona sa Sanciangko’s Wildflower kay duol ra man kini sa tunghaan. Gi-table siya ni Mr. Conde.

“Dili ka angay’ng mauwaw Dianne kay disinte ang matang sa imong pagsayaw. Dili ka sama sa ubang dancers. Wa ka magpasundayag sa imong pribadong parte sa lawas… diha ako mihanga kanimo,” matud ni Mr. Conde.

Igo lang mipahiyom si Dianne. Gipahatagan ni Mr. Conde og ladies drink si Dianne. Pormal kaayo si Mr. Conde kay wala gani kini migunit bisan sa kamot na lang sa iyang tinun-an.

Taud-taud, mikuot si Mr. Conde sa iyang pitaka ug gitawag ang waiter. “Mopauli na ko Dianne, ikaw na la’y bayad ug imo na ang sukli,” matud ni Mr. Conde dungan sa pagtunol kaniya sa tibuok usa ka libo ka pesos.

Hilabihan kalipay ni Dianne kay gawas sa bahin niya sa ladies drink nga gi-order kaniya sa iyang maestro, iya pa g’yud ang sukli.

Pagka ugma, nag-snack si Dianne sa canteen sa tunghaan ug wala niya damha nga moduol kaniya si Mr. Conde.

“Dugay ka ba nga nauli kagabii? Kun may problema ka ayaw kataha pagduol kanako Dianne. Kining mahimo ba nga dili ka lang mo-duty unyang gabii, makigpanuroy ko kanimo,” matud sa maestro ni Dianne. (Sumpayan pa)