Usa ka matang sa penetensiya

Malipayon ug puno sa kadasig ang mga batan-on sa barangay Magsico, usa ka hilit nga dapit sa Masbate, nga nagpahigayon og pagpananom og mga utanon ug mga lagutmon ginamit ang inantigong pamaagi sa organic farming. Kining maong kalihokan gipangulohan nila ni Harvey ug ni Kristine nga maoy chairwoman sa SK sa maong barangay.

"Unsa ba gayud kining organic farming?' pangutana ni Tikboy ngadto nila ni Harvey ug Kristine.

"Kining organic farming mao ang matang sa pagpanguma nga wala magsalig sa mga commercial fertilizer ug pesticides aron pagpatubo sa mga tanom kun dili ginamit ang mga natural nga pamaagi nga dili makadaot sa yuta ug sa kalikopan. Gawas nga makaluwas sa kalikopan makadaginot pa gayud kita," tubag ni Harvey.

Nakadayeg sa hilom si Kristine sa kalantip og pangisip ni Harvey. Mga lima na ka tuig sukad nahiabot ang ulitawo sa ilang dapit ug nagpabilin ang misteryo sa pagkatawo niini. Hilomon kaayo kini pero ugdang ug undanon kaayo kun mao nay motingog. Gusto kini nga pirmi mag-inusara. Sa ilang nahibaloan pag-umangkon kuno kini nga gikan sa Manila sa mananagat nga si Noy Toriano.

Dako kaayo og natabang si Harvey sa pagpalambo sa ilang barangay ilabi na sa natad sa pagpananom ug maingon man sa pagpamuhi og mga hayupan. Ang ulitawo usab maoy nangulo sa pagtukod og dam o patubig pinaagi sa daginoton nga pondo sa barangay, para sa ilang umahan. Dili lamang sa pagpanguma nakatabang si Harvey kun dili hasta usab sa peace and order sa maong dapit. Dihay usa ka higayon nga tulison unta ang halin sa kopras nila ni Kristine ug sa iyang amahan nga si Ingko Damian maayo gani kalit nga nahiabot si Harvey ug didto nasaksihan ni Kristine ang katakos ni Harvey sa martial arts dihang nalupig niini ang lima ka tulisan nga gipangulohan ni Hugong Tigbas.

Lain usab nga higayon nga napakita ni Harvey ang usa ka bayanihong buhat dihang iyang giluwas sa way kukahadlok ang anak nila ni Goryo ug Takya nga maanod unta sa baha. Nitumaw sa alimpatakan sa mga lumolupyo sa barangay Magsico ang dakong pangutana, kun nganong sobra ka matinabangon si Harvey. Kini maoy nakapasamot sa tanghaga nga naglimin sa pagkatawo sa ulitawo.

Usa ka adlaw niana samtang naglingkod si Harvey sa nag-igdal nga bato sa may baybayon. Lawom kining naghunahuna ug milatas ang iyang panan-aw ngadto sa lapad nga lawod sa kadagatan. Daw lana ang kalinaw sa dagat ngadtong tungora, sukwahi niadtong usa ka higayon diin gikusokuso sa mapintas nga bagyo ang bapor nga ilang gisakyan gikan sa Cebu ngadto sa kaulohan.

Mga katorse sila ka piniriso sa BBRC nga gikatakda nga ibalhin ngadto sa Muntinlupa sa kaso nga multiple homicide ug rebelyon. Padulong kadto sila sa Manila, dihang walay palad nga nalunod ang barko nga ilang gisakyan. Niadtong maong hitabo si Harvey palaran nga naluwas ug nabangalan sa mananagat nga si Manoy Toriano. Iyang gihangyo ang tigulang nga mananagat sa pagdili pagtaho sa maong insidente ug itago ang iyang tinuod nga pakatawo.

Padayon nga gilupad si Harvey sa iyang handurawan pabalik niadtong mga adlaw nga nagtungha pa siya sa University of the Philippines, usa siya ka aktibista nga nangita og kausaban sa sistema sa panggobyerno hangtud nga nahilambigit siya sa kalihokang walhon ug nahisakop sa pundok ni Kumander Sidro. Usa niana ka hapon, tabo kadto sa sitio Pangilatan, Cebu, ug nasugatan nila ang tropa nila ni Army Capt. Bobby Kerozo ug si Sgt. Joel Larosa nga niadtong tungora nagtakoban isip mga manindahay og okay-okay. Nahitabo ang wala damha nga engkuwentro. Aduna gayoy mga inosenteng sibilyan nga wala tuyoa nga nangapagan. Nasikop ang pundok nila ni Harvey.

Nakadesisyon si Harvey nga dili mosurender ngadto sa otoridad, ang iyang mga adlaw ug katakos iya na lang igahin sa pagtabang ngadto sa mga tawo nga nagkinahanglan bugti sa dako niyang kasal-anan ug isip usa ka matang sa penetensiya. (Kalaposan)