Lovers in Pari-an

 Gula 98

Nakasabot si Rosalinda kun nganong gikuha ni Atty. Gumera gikan kaniya ang iyang cellphone. Dili kini gusto nga may komunikasyon sila si Bongkoy. Lain na usab kining pagpangapiki ni Atty. Gumera nila ni Bongkoy, niya pa sa hilom.

Nasubo pag-ayo si Bongkoy pagkasayod nga nasakpan ni Atty. Gumera nga naghupot og cellphone si Rosalinda ug gibawi ang maong kahimanan sa ilang agalon.

“Ako gyud tong sa’a,” ni Rosalinda pa. “Kompiyansa man gud ko kaayo. Wa na lang sab ko moreklamo dihang gibawian ko niya sa cellphone kay tingalig masuko siya nako.”

“Nag-anam na gyud og kasalbahis ang atong agalon, Ros,” nagkanayon si Bongkoy. “Inanay nang mipatigbabaw ang tinuod niyang kinaiya. Dili diay siya tinuod nga buotan ug masinaboton sumala sa atong pagkaila kaniya.”

“Unsa may atong buhaton karon?”

“Nagduda ko, Ros, nga may lain pa siyang buhaton aron maapiki kita. Iya gyod kitang lisodlisoron pag-ayo. Way arang kaniya kun unsay iyang buhaton kanato tungod kay ania kita sa iyang poder. Mao nga ang angay natong buhaton mao ang pagbiya niining maong panima’y.”

“U-unsa?” -- Sumpayan pa