Lovers in Pari-an

“Pero di man ko maantigong mogamit niini,” ni Rosalinda. “Sayon ra ni. Tudloan tikaw.”

Gitudloan tuod ni Bongkoy si Rosalinda sa mga basic kun unsaon paggamit ang cellphone. Kadali ra siyang nakakat-on.

“Tagoi lang kana,” tugon ni Bongkoy. “Ayaw ipakita ni bisan kinsa aron dili ta mabulilyaso.”

Sukad niadto, nahimong sayon alang nila ni Rosalinda ug Bongkoy ang komunikasyon. Kun may tuyo sila sa usa’g-usa, ipaagi na lang nila sa text. Kun gusto silang magkita, magsabot sila pinaagi sa text.

Apan wala magdugay ang pagpahimulos nila sa maong kahigayonan. Usa ka higayon niana, nasakpan ni Atty. Gumera nga may cellphone si Rosalinda. Gikuha sa agalon ang maong kahimanan gikan kaniya.

Labihang lagota ni Rosalinda. Alang kaniya, wala’y katungod si Atty. Gumera nga mobawi sa cellphone gikan kaniya. Dili kini ang nagpalit sa maong kahimanan kundili si Bongkoy. Gipalit kini ni Bongkoy alang kaniya, aron duna sila’y magamit sa pagkontakay sa usa’g-usa. -- Sumpayan pa