Gula 92
“Ayaw na siya’g hisgoti, please,” ni Lonia pa.
“O-okey,” ni Rev. I’-I’m sorry...”
Kahilom.
“Motuo ka ba nga usahay idlas ang katumanan sa gugma?” Nangutana si Lonia.
“Oo,” tubag ni Rev. “Pero once nga maangkon na nimo ang gugma nga alang gyud kanimo, dili na gayod kini mabawi ni bisan kinsa. Pero nganong nakapangutana ka man og ingon niana?”
“Tungod kay ingon niini ang akong kasinatian sa gugma. Idlas ang katumanan. Ang tinuod, nagkagusto ko nimo kaniadto pa. Gipaningkamotan ko lang nga dili nimo masabtan tungod kay dili ko buot nga magtuo ka nga cheap ko nga pagkababaye. Pagkasayod nako nga girlfriend nimo si Mylene, hingpit nga nahanaw ang akong paglaom nga makabaton og katumanan ang gugma ko kanimo.”
“Sa dihang nakita ko ikaw, nadiskubrehan ko sa akong kaugalingon nga ikaw ang matuod kong gihigugma ug dili si Mylene. Ugaling lang kay may relasyon na kami. Dili ko gustong mamugsay sa duha ka suba. Dili ko buot mo-compromise og relasyon. Mao nga gipaningkamotan ko usab nga dili makapakita’g gesture nga nakagusto ko nimo.”
“Pretender ka sab diay, ha,” gikusnit ni Lonia ang kilid ni Rev.
“Of course,” ni Rev nga nahaigpot. “Writers are great pretenders. Sama nimo, usa usab ako ka magsusulat sa wala pa ko mahimong editor. Busa walay katarongan nga dili nako mahimo ang imong gihimo.”
Wala na motingog si Lonia. Mikidlap ang iyang mga mata nga mitutok kang Rev.
“I love you, Lonia,” ni Rev pa.
“I love you, too, Rev,” tubag ni Lonia.
“Kitang duha ang magpakasal tungod kay kita ang alang sa usa’g-usa.”
Motubag pa unta si Lonia apan giukoban na ni Rev ang iyang mga ngabil. Mora’g gibayaw si Lonia sa langit. (Kataposan)