Libre nga live show

Labihang laguta ni Celso karong buntaga nga nakakita og lungag sa koral nga hollowblock sulod sa iyang compound. Ngil-ad na tan-awon nga may lungag na ang koral niya nga hollowblock. Masulod ang komo sa bata sa maong buslot. Masuling na karon ang basketbolan sa Upper Canduman nga maoy kasikbit di layo sa maong koral.

Bisag way finishing ang maong koral arng-arang man lang tan-awon kay hanip man ang pagkakamada sa mga hollowblocks. Way nagsibag. Apan dihang may lungag na kini, laksot na tan-awon. Naglaraw siyang panid-an niya iyang mga sulogoon kun kinsay naglungag ini.

Biyudo na si Celso. Sobra 60 na iyang edad. Ang iyang duha ka anak nga babaye’g lalaki nakahuman nag mga kurso. Nangaminyo na. Tua na nagpuyo sa iyang laing apartment sa Talamban. Duna siyay refrigeration and aircon repair shop sa Talamban nga iyang gipiyal sa iyang pag-umangkon. Semi-retire na siya sa iyang negosyo. Apan duna gihapon siyay sangang buhatan sa iyang shop dinhi sa Upper Canduman. Aron di siya laayon nga wa nay kalingawan, nag-abli siyag videokihan, karenderya, water refilling station ug bakery. Nagtukod sab siya’g unom ka doors nga duplex apartment sa luyo sa videokehan. Nipuyo siya sa usa ka door. Di na siya mingawan. Ug mokanta sab siya panagsa sa iyang videokehan. Nahimutang ni tanan iyang compound sulod sa tres mil metros cuadrados nga luna nga napalit niya.

Si Edna iyang kusinera nga buwag og bana. May duha ka anak nga gagmay pa. Sila si Clark ug Jake. May duha siya ka silbedora sa videoke ug karenderya. Sila si Jane ug Alice. Di mawad-an og customer iyang videokehan ug karenderya, tungod kay agianan sa mga trabahante sa mga pabrika sa Tawason. Ug tungod sab kay puro na may nag-abang sa tanang doors iyang apartment. Ang sinaligan ni Celso sa panaderya si Freddy. Ang sa water refilling station si Jessie. Igo lang siya sa pag-surpervise ining iyang mga sakop matag karon ug unya. Wa man hinooy badlongon. Puro man maayong motrabaho. Stay-in ni tanan iyang mga sakop. Apan mahibulong siya ni Freddy ug Jessie magabii huma’g panihapon. Mopasangil sila’g tan-aw og telebisyon sa ilang Celso. Inig ka taudtaod, magsininyasay ug maghunghonganay. Manggawas. Kasagaran hapit na alas diyes sa gabii.

Usa ka gabii, hilom nga gisundan ni Celso si Freddy ug Jessie nga puro pa ulitawo. Mga pag-umangkon ni sila ni Edna. Kay si Edna dugay na nga katabang ni Celso. Didto pa sa Talamban. Sa wa pa siya nabiyudo.Ug sinaligan na kaayo niya. Mao nga iyang gi-parekomendar og mga tawo. Didto padulong ang duruha sa koral nga may lungag.

     "Ooohh! Aaaahhh!" tingog sa babaye’g lalaki gikan sa gawas sa koral. Morag gisakitan o gilamian paminawon. Ang duruha nagpulipuli nag lili sa lungag. Wa kamatikod nga naa na si Celso sa ilang luyo.

      "Patan-awa kog apil, bi" honghong niya sa duha dungan ang pagpikpik sa ilang mga abaga.

       "Huh!" ni Freddy.

       "Sir, Sir!" ni Jessie.

       Naglumba silag dagan sa kaulaw. Paglili ni Celso, nakita niya ang babaye’g lalaki nga nagromansa sa yuta nga gibanigan lag plywood.

Kining nahimutangan nila, tago nga puwesto. Kay nabakante ni dihang gibalhin ang tindahan ni Merto atbang sa karsada. Ug nahibilin pa ang mga koralkoral nga sin ug mga plywood nga ginamit. Makita sila sa dan-ag sa suga sa kilid sa basketball. Apan tungod sa kamingaw sa lugar, nagtoo ang nanagdate nga way nakamatikod nila.

Pagkauma, gisumbong ni Celso ngadtong Edna ang gibuhat ni Freddy ug Jessie. Gikasab-an silang Edna. Nagdungoydungoy lang ang duha. Nangayo’g pasaylo.

"Adto mo pangayog pasaylo sa inyong Sir. Kun di mo pasayloon, taktak gyud mo sa trabaho!" ni Edna.

Hapit moluhod sa atubangan ni Celso ang duha. Nagpahiyom lang si Celso. Nakasabot siya nila. Mogasto paman gani ang uban og palit og bomba movies o sex films nga pirated CD o DVD, kana pa ba hinoong live show unya libre.

"Ayaw na mo anang panglili! Makadaut na sa mata" ni Celso. "Bulita lang ang lungag og semento. Unya ipahakut ni Noy Merto ninyo ang tanang materyales nga nahibilin sa iyang karaang puwesto ngadto sa iyang gibalhinan," dugang ni Celso. Nahuwasan ang duruha sa ilang kaminghoy ug kakulba. (Katapusan)