Gula 90
Nangayo og pasaylo si Mike ngadto kang Lonia. Way nahimo si Lonia. Gipasaylo niya si Mike tungod kay nakasabot siya nga dili tinuyoan niini ang nahitabo tali kanila ni Bernadith. Si Bernadith ang angay basulon sa nahitabo.
Apan sakit kaayo alang kang Lonia ang gidangatan sa relasyon nila ni Mike. Mora siya’g mabuang sa tumang kaguol. Nabanhaw ang kahimangod niya sa kalibotan nga kaniadto gikumkom sa iyang dughan.
Wala ba gayod diay siya’y katungod nga magmalipayon niining kalibotan uban sa lalaki nga iyang gihigugma? Nganong idlas man ang katumanan sa gugma alang kaniya? Nganong ang tanang lalaki nga iyang higugmaon mapanag-iya man sa lain?
Ang una mao si Alex nga naminyo ngadto ni Chona. Ang ikaduha mao si Rev nga boyfriend usab ni Mylene. Napapas ang gugma niya kang Rev sa dihang nagkarelasyon sila si Mike. Apan karon, si Mike giilog usab ni Bernadith gikan kaniya, butang nga nakapahisagmuyo kaniya pag-ayo.
Wala kapugngi ni Lonia ang iyang mga luha. Mihilak siya ug mihilak. Mibakho siya taman sa ginhawa aron ikapahungaw ang tanang naghuot sa iyang dughan. Siya lamang usa sa balay busa wala siya’y pagpakabana nga may makadungog sa iyang paghilak.
Nagpadayon si Lonia sa paghilak aron pagpawong sa nagbaga nga kasakit. Nagdugo ang iyang kasingkasing tungod sa nahitabo sa gugma nila ni Mike. Ug wala siya’y laing kasumbongan sa iyang mga kasakit niining higayona gawas sa pagpaagas sa iyang mga luha. -- Sumpayan pa