Migradwar ang engkanto

Samtang naglingkod uban sa talay sa teaching staff sa eskuylahan, mibathay ang talagsaong pahiyom ni Mam Fe Sumaylo, dihang gitawag na ang ngalan ni Lucino nga usa sa migradwar sa 60 ka mga estudyante sa 4th year high school sa TRHS. Ginuntan kini niya sa pagpanglingo.

Isip maoy adviser sa tanang 4th year Section-A, si Mam Fe lamang ang nasayod sa matuod nga pagkatawo ni Lucino nga mitug-an ug mikompisal kaniya sa tanan niining sekreto.

"Ikaw lang ang tug-anan ko sa tanan, Mam! Usa ako ka engkanto...!"

Nakurat si Mam Fe sa gitug-an kaniya ni Lucino, usa ka hapon nga nagpabilin kini sa ilang classroom human sa hapunon nga klase sa mga tinun-an.

"Maayo kay gitugtan ka’s imong parents nga mga engkanto nga moeskuyla ka dinhi sa among kalibutan ... dinhi sa TRHS...!"

"Gihangyo ko sila. Ug kay bugtong kong anak ug pinangga nila, wa nila balibari ang akong gihangyo nga moeskuyla sa TRHS aron lang ko makagradwar sa hayskol...!"

Usa ka transferee nga estudyante si Lucino nga nagpa-enrol sa 4th year high school uban sa karaang mga estudyante nga nag-eskuyla gikan pa sa first year ug hangtod na karon sa 4th year high school. Nagtuo ang tanan niyang mga klasmet nga anak og usa ka Amerikano si Lucino kay puti man ang iyang pamanit.

Apan si Mam Fe lang ang pakit-on ni Lucino sa serbis niining sports car sa eskuylahan, nga dili gayud makita sa tanang mga estudyante sa eskuylahan. Tulo na usab ka higayon nga gidala ni Lucino si Mam Fe ngadto sa daw mansyon nilang pinuy-anan. Naila-ila na usab ni Mam Fe ang mahigalaong mga ginikanang engkanto ni Lucino nga nanag-iya og 30 ka ektaryang kakawan sa tibuok Barangay Bagtik. Apan ang tanan niyang mga klasmet sa 4th year wala gyud masayod nga usa diay ka engkanto si Lucino.

Ug wa makalingkawas si Mam Fe sa pagka-prangka ni Lucino ngadto kaniya.

"Dugay na kong naniid sa pagka-maayo mong maestra dinhi sa TRHS, Mam Fe! Nindot kang motudlo, Mam! Gawas pa, na-in-love gyud ko nimo, Mam! Ang insekon mong mga mata maoy kanunay'ng mohadla sa akong kaisipan! Pasayloa ko nga daw usa ka pangahas kining akong pagsulti kanimo sa matuod kong gibati, Mam...!"

Wala makatingog si Mam Fe human mabati ang pagpangamoral kaniya sa tinun-ang engkanto. Wa sab siya makasabot sa tinuod niyang gibati ngadto kang Lucino.

"Try your best nga makagradwar ka, Lucino! Ug unya na nato hisgoti kanang giingong love mo kanako, ilabi na nga di parehas ang kalibotan tang gipuy-an...!

"Oo, Mam Fe! Himuon kong inspirasyon ang akong love nganha nimo!"

Maoy nasugat sa panan-aw ni Mam Fe nga gikihatan siya ni Lucino human kini makadawat sa iyang diploma didto sa entablado. Inanay niya nga nabatyagan ang paglakdop sa tumang kamingaw karon nga migradwar na ang estudyante niyang engkanto. Tipik na sa iyang kasingkasing si Lucino. (Kataposan)