Gula 89
“Lonia...” Mao ray nalitok ni Rev nga ingon sa nahisagmuyo pag-ayo.
Wala madugay, nanamilit na si Rev kang Lonia. Huyhoy ang mga abaga niini nga mikanaog sa iyang gipuy-an. Gisundan kini pagtan-aw sa dalaga. Wala lang tuyoa, gibati niya ang kaluoy ug kahinugon.
Nganong karon ka man lang, Rev? Ngano man? Hunghong niya sa kaugalingon.
Milabay ang usa ka bulan...
Usa ka adlaw niana, ingon sa gidakdakan si Lonia sa kalibotan sa dihang miabot sa iyang kasayoran ang makapasubo nga balita. Nasayran niyang kaslonon na si Mike ngadto kang Bernadith. Nakugang si Lonia sa maong hitabo.
Nangita gayod og paagi si Bernadith nga maangkon niini si Mike. Gipikot niini si Mike hinungdan nga napugos ang ulitawo sa pagpangasawa niini.
Si Mike mismo ang miasoy kong Lonia sa tinuod nga nahitabo pinaagi sa pagtawag niini sa iyang cellphone. Mitambong si Mike sa birthday party ni Bernadith agi’g pagsanong sa pagdapit sa dalaga. May gipainom si Bernadith kang Mike nga makapakatulog sa ulitawo. Sa pagmata ni Mike, gikadulog na niini si Bernadith ug pulos na sila walay mga sapot. -- Sumpayan pa