Idlas ang katumanan sa gugma

 Gula 87

Pagkaugma, nagkita sila si Lonia ug Mike sa food avenue sa Metro Gaisano. Mi-text man gud ang ulitawo kaniya nga magkita sila sa maong dapit kay may mahinungdanon silang panagsultihan.

“Magminyo na ta, Lon,” laktod nga bungat ni Mike nga ingon sa nakagambalay nang daan sa igsusulti niini.

“U-unsa?” Nakugang si Lonia sa kalit niining pag-propose og kaminyoon.

“Gusto kong makasal na kita, Lon. Total, naa na man ta sa hustong edad.”

“Ngano bang kalit man kaayo kining imong pag-propose kanako og kaminyoon?”

“Gusto lang kong makaseguro nga kita na gayod hangtod sa hangtod. Gihigugma ko ikaw sa tibuok kong kinabuhi.”

“Gihigugma ko usab ikaw, Mike. Pero dili sayon alang kanako ang paghukom bahin sa kaminyoon. Ang kaminyoon maoy usa sa labing dakong desisyon nga atong himuon sa atong kinabuhi.”

“Buot mo bang ipasabot nga imong balibaran ang akong proposition?”

“Hatagi una ko’g igong panahon sa pagtimbangtimbang nianang butanga. Please lang, Mike, sabta ko.”

“O-okey,” ni Mike nga ingon sa mabalak-on.

Wala damha ni Lonia nga mahimo niyang bisita si Rev nianang pagkagabii. Nasurpresa siya sa pagbutho niini sa iyang gipuy-an. -- Sumpayan pa