Ongo sa Tabunok

Si Elaine usa ka langyaw nga nagpuyo sa Tabunok, Talisay City, Cebu. Siya natawo ug nagtubo sa usa ka probinsiya sa Mindanao. May maanyag nga hitsura ug maanindot nga pigura sa lawas. Pirme siyang isalmot sa mga kompetisyon sa iyang mga ginikanan.

Sa pag-edad niya og dise-otso anyos sa dihang miapil siya sa indigay didto sa ilang baryo adunay tawo nga mikalit lang og sabli'g sa acido sa iyang nawong, mao kini ang hinungdan sa pagkasunog sa iyang maanindot nga dagway.

Milabay ang pila ka buwan wala na gayud siya makaagwanta sa pagpuyo sa ilang baryo tungod sa kadaghan og bati nga istorya nga iyang madunggan bahin kaniya. Nakahukom gayod si Elaine nga magpakalayo sa ilang lugar. Nahiabot siya dinhi sa Sugbo ug nag-istar sa Tabunok.

Gikauwaw ni Elaine ang iyang hitsura tungod kay aduna kini depekto. Sa iyang gipuy-an dili na gayud siya mogawas maadlawan ug magpabilin lamang nga ngitngit ang iyang balay.

Matag gabii na gayod siya molakaw kanang magmingaw na ang maong palibot. Sa paglabay sa mga buwan ug adlaw, nahibulong na ang mga tawo kaniya ug gidudahan siya nga usa ka Ongo ug wakwak sa maong lugar tungod sa kadaghan na og nangamatay ug nakuhaan nga mabdos.

Alang sa mga tawo kahadlukan gayud ang maong dalaga tungod sa dagway niini. Napatik ang maong Ongo sa mga mantalaan apan may usa ka lalaki nga dili gayod motuo bahin sa maong mga tabi sa katawhan. Gusto niyang mahimamat ang maong babaye nga giingong "Ongo sa Tabunok".

Giadto sa lalaki ang maong dapit mihunong siya sa iyang motor tungod sa kakusog sa ulan ug midagan padulong sa gamay nga payag kilid sa maanindot nga baybayon.

Nakabangga siya og usa ka tawo tungod sa kangitngit, didto niya nakita ang usa ka maanindot nga pigura sa babaye nga nagsuot og puting bestida, ang taas ug itom nga buhok niini miuyon sa huyop sa hangin samtang naglakaw.

Gisundan niya si Elaine.

"Kinsa kaman nganong ania kaman ning gabhiuna wala ka ba mahadlok sa mga istorya?" pangutana ni Elaine.

"Unsa may akong kahadlukan? Tes diay ang akong ngalan, ikaw unsay ngalan nimo?" Matud pa sa lalaki.

"Huh! nakahimo ka pa pagpangutana sa akong ngalan, kung isulti ko kanimo nga mag-atubang dili ka kaha mahadlok sa akong dagway?" tubag pa ni Elaine.

"Wala akoy angay kahadlukan kay may pagsalig ako sa Ginoo ug sa akong paminaw usa ka kabuotan nga tawo ug usa pa taga dinhi pud ako sa Cebu."

Mihunong ang kusog nga ulan, migawas ang buwan gikan sa itom nga panganod ug midan-ag ang kahayag niini sa baybayon. Gibalik ni Tes ang iyang mga mata sa pagtan-aw kang Elaine ug didto niya nabatyagan ang ngil-ad nga sunog sa maong dagway. Ongo siya kung tan-awon ug didto niya nasuta nga si Elaine gayod ang giingon nga "Ongo sa Tabunok".

Pero bisan sa kangil-ad sa nawong sa maong dalaga, ang mga mata niini nagpakita gayud ug nagsulti nga dili siya usa ka dautan, luoy siya kung buot hunahuna-on.

Paglabay sa pila ka gutlo miabot ang pundok sa katawhan nga may dalang sulo nga may kalayo. Misinggit ang usa kanila,"Ania ra ang Ongo ning atong dapit! Sige patya!! Giduot siya ni Tes ug gipadagan pahilayo apan mibalibad si Elaine ug misulti sa tinuod niyang ngalan."

Ako si Genelyn, daghang salamat sa imong tabang apan dawaton ko ang ilang buhaton kanako.

"Socrates pud ang akong ngalan" tubag sa maong lalaki.

Gidakop sila sa katawhan daw gipalibutan og kalayo. Wala na gayud silay kalusutan. Dili na maluwas ni Socrates ang dalaga ug bisan man ang iyang kaugalingon. Gigakos niya si Genelyn og maayo ug giatubang ang kamatayon kauban ang "Ongo sa Tabunok." (Kataposan)