Gula 88
“Ambot lang,” ni Tasing. “Basta kay mora man to’g nasuko.”
“Nganong nangita pa man siya namo?” Gikan ni Rosalinda. “Nasayod man siya nga moadto ko sa ospital kay karong adlawa ang igawas sa akong mga manghod sa tambalanan.”
“Mao lagi,” ni Tasing pa. Pero wala magdahom si Atorni nga kauban diay nimo si Bongkoy. Mao tong mora’g nasuko siya pagkasayod nga nagkuyog mong duha.”
Wala makatingog sila si Rosalinda ug Bongkoy.
Gipatawag ni Atty. Pomposo Gumera si Bongkoy pagkasayod niini nga nahiabot na sila. Ang duha didto magsultihanay sulod sa lawak sa nahauna.
Gikuyawan si Rosalinda samtang naghulat sa paghibalik ni Bongkoy. Nabalaka siya pag-ayo. Nagkadaiyang mga pangagpas ang midumbol sa iyang kaugalingon nga nakapahasol kaniya.
Wala madugay, nahibalik si Bongkoy. Namatikdan niya nga huyhoy ang mga abaga sa ulitawo. Subo kaayo ang nawong niini.
“Unsay nahitabo?” Gisugat niya’g pangutana ang hinigugma.
Walay tubag. -- Sumpayan pa