Idlas ang katumanan sa gugma

Gula 83

Midali siya pagbiya sa tungod sa pultahan. Mipaingon siya sa comfort room. Unya na siya molahos pagsulod sa opisina ni Rev kun makalakaw na si Mylene.

“Pila gyud ka nobela ang giplano nimong sulaton sa Kapalaran series,” pangutana ni Rev dihang nagkaatubang na sila si Lonia.

 Bag-o lang niining gidawat ang manuskrito sa nobela nga iyang gi-submit.

“More than thirty novels,” tubag ni Lonia. “Ipabasa ko lang unya nimo ang gihikay nakong storylines sa matag nobela nga akong sulaton.”

“Mahimong sulaton mo na ang maong mga nobela bisan wala pa nako mabasa ang mga storyline niini,” ni Rev pa. “I trust you. Pero just submit the storyline for formality reasons. Okey?”

“Okey,” sanong ni Lonia.

“Ipadayon lang gyud ang maayo nimong performance. May lain pang nindot nga plano ang management sa UCV Romances alang nimo.”

“Unsay buot mong ipasabot?”

“Human sa Kapalaran series, nagplano ang management nga papirmahon ka og laing kontrata alang sa lain na usab nga series of novels.”

“R-really?”

“Yes. Mao nga karon pa lang gani mas maayong mag-andam ka na kun unsa ang series nga sunod nimong sulaton.”

“Dili kana problema. May nahunahunaan na kong laing series nga mugnaon after sa Kapalaran series.”

“Good. Mao kanay akong nagustohan nimo pag-ayo kay kanunay ka nga advanced. Dili ka magpabiya sa panahon.” -- Sumpayan pa