Padre, mangumpisal ako

“Unsa! Uyab ni Gally si Lani?” Nahingangha si Tulume, ang sakristan ni Padre Romeo Limtuaco ang buotang kura paroko sa lungsod sa San Quentin.

“Ngano man diay? Mahibulong ka pa ba nianang Gally nga hasta ang uyab sa mutsatso, gipanguyaban.”

“Nganong di man ko mahingangha nga kana si Lani, kabit man ni Padre Romeo.”

“Nahibawo diay ka?” mitimang si Kulas palahubog.

“Nganong di man ko mahibawo nga ako may tigkuha kang Lani aron dad-on sa lawak ni Padre Romeo kada tungang gabii.”

“Kada gabii diay -- makahimo pa diay si Padre Romeo ana?”

“Ngano man, gitiguwangan ka ni Padre Romeo, naa pay lamiang pagkaon kanunay?”

Ingon niana ang tabi nga mikaylap sa tibuok San Quentin.

“Buot ninyong ipasabot nga nailog ni Gally si Lani gikan kang Padre Romeo nga pinangga kaayo na sa pari ug pinalitan sa tanang gusto.”

“Unya, unsa may atong kalibotan nga mas maayo diay ning moromansa si Gally kay kang Padre Romeo ug kusog pa gayud ang libido,” dason ni Kulas.

“Unsa man nang libido, Bay Kulas?”

“Kana gong sexual energy.”

“Mao ba?”

Nianang pagka-gabii, nakigkita si Tulume kang Gally. “Gal, makigsulti kono nimo si Padre Romeo.”

“Asa man?”

“Adto sa iyang kombento.”

“Ingna si Padre Romeo nga mangumpisal ko niya ugma sa buntag, anha na lang mi magsulti. Sige, lakaw na.”

Naglingkod na si Padre Romeo sa sulod sa kompisyonaryo sa pag-abot ni Gally. Miduol dayon kini og miluhod nga nanugid.

“Padre, nakasala ko nimo, pasayloa ko Dre.”

“Isugid una ang tanan mong sala kay kun di ko kauyon, ambot lang kun mapasaylo tika.”

“Na-uyab ko ang imong kabit, Padre, ug dili na kuno siya mobalik nimo kay boring ka kono.”

“Kinsang kabita, kay tulo na sila?” nahasinta ang tingog sa pari.

“Ang guwapang si Lani, Padre, seksi kaayo ug maayo kaayong moromansa.”

“Simberguwensa ka Gally. Bayri ang tanan kong gasto kang Lani kay kondili, sunogon ka sa imperno kay dili taka pasayloon, nakasabot ka?” napasinggit ang pari, dayong tindog niini aron moadto sa kombento nga nagbagulbol. (Katapusan)