Hambog nga sekyu

Unsay sulti niadtong tawhana, Pre? nangutana si Imok kang Kulas. Duna kuno siyay igsoon nga heneral, Pre, ug matud pa sa pag-umangkon niya nga iyang kuyog, gitabangan kuno siya og siyam ka tawo, Pre. Unya, wa gyud kono siya maigo, Pre, bisan sa kadaghan nga nagtabang niya.

"Wa gyud, Pre, pero wa sad siyay naigo, Pre."

"Mao nay ngilngig, Pre, mao nga kun mosulti siya, mora sab siya'g heneral."

"Ingon man gyud niana, Pre, pareho god sa kanding nga nakasandig sa kabaw, abi niya’g kabaw na sab siya."

"Tingali nindot kaayo siyag trabaho, Pre, kay maayo man og pamiste."

"Suhito man ko niana, Pre, usa ra may anak ana, Pre, nga wa gani maka-college ug ulitawo unya nagtaban og babaye. Pila lang ka bulan, Pre, gipapahawa sa inahan ang pobreng babaye."

"Ngano man nga gipapahawa man sa inahan ang babaye, Pre?"

"Kay maid man lang ang babaye, Pre, ug tingali profesor ang anak niyang tambay, Pre."

Ingon niana ang gihisgutan sa duha ka mag-kumpare. Milabay ang pila ka bulan ug nagkita og usab ang magkumpare.

"Oy, Pre, asa man ka nga mora ka man og nagdali?"

"Magremedyo ko'g kuwarta, pre, kay wa mi malung-ag."

"Kay ngano man diay, Pre, lung-agon diay nang kuwarta?"

"Di, ba, wa koy ipalit og malung-ag. Bi, basin duna ka, pautanga hinoon ko diha, Pre."

"Wa sad gyud koy kangho, Pre, nganong di ka man hinuon mangutang didto's amigo nimong heneral?"

"Unsa gong henerala, Pre, nga hikit-an nako, sekyu ra man diay Pre."

"Unya, profesor man kaha ang anak?"

"Unsa bang profesora, Pre, nga igo ra man nakahuman sa high school."

"Mao ba? O, niay akong usa ka gatos, Pre, tunga ta ini."

"Salamat kaayo, Pre, makapalit nako og usa ka kilong bugas, ini, Pre."

"Na, hala, aron makalung-ag ka dayon kay mangarga pa ko diri sa Carbon." (Kataposan)