Idlas ang katumanan sa gugma

“Giprangkahan ko na siya, Mike, nga dili na siya angay pang molaum sa imong gugma. Nga hunongon na niya ang iyang pag-ilusyon.”

Pagkasunod semana mibalik si Lonia sa buhatan sa UCV Romances. Dala na niya ang laing nobela nga nahuman na niya pagsulat aron i-submit kini ngadto kang Rev.

Napahunong sa paglakaw si Lonia sa dihang nagkaduol na siya sa tungod sa pultahan sa buhatan ni Rev. Nabati niya ang kusog ug masuk-anong tingog sa lalaki gikan sa sulod.

“Ang nakadaot nimo, Mylene, kay sobra ka ra ka demanding,” puno sa kapikal ang tono sa sinultihan ni Rev.

“May daotan ba kun mag-demand ko?” Sikmat ni Mylene. “May katungod ko nimo tungod kay boyfriend ko ikaw.”

“Pero sobra na ang imong gibuhat. Milapas ka na sa limitasyon.”

“There’s no standard limitations para nako. Ang gusto ko nga motuman ka sa akong gusto.”

“Mao kanay dili mahimo. Dili ko usa ka robot. Ug may prinsipyo ko, Mylene. Dili ko makahimo sa pagsunod sa imong gusto kun supak kini sa akong kabubut-on. Ayaw ko himoang kiko-kiko. Maka-turn-off ang imong batasan.”

“Damn you, Rev!”

“Utro ka pang buysit!”

Gilainan si Lonia sa iyang nadungog. Misantop sa iyang hunahuna nga dili siya angay mamati sa panaglalis sa duha ka managhigugmaay. It’s none of her business. - Sumpayan pa