Ang istriktong amahan

CEBU, Philippines - Unsa may imong tuyo dinhi, Dong," nangutana si Iyo Pedring sa ulitawo nga si Dario nga dugay nang nag-ibid-ibid sa anak niyang dalaga nga si Amelia. "Suroy-suroy lang ko, Noy," mangiulawon nga tubag sa ulitawo.

"Uy, Amelia! Adora! Misinggit pagtawag si Iyo Pedrong sa duha niya ka dalaga. "Panganaug mong duha diha aron manilhig ug manglimpiyo mo diri sa atong nataran kay may tawo nga magsuroy-suroy."

"Na-unsa ba intawon na si Tatay, uy, mauwaw man lang ta. Hasta hinuon si Dario, di nalang mosaka dinhi kay mataha sa ka-istrikto ni Tatay, mao pay manggi-ulawon kaayo na," bagolbol ni Amelia.

"Kanauga didto Nang," misugyot ang manghud, "tingali'g mouli nalang sab na's Dario nga dili gyud ka sulti. Ayaw na lang god na tagda's Tatay."

"Uy! Ikaw diay, Dario, saka una diri," matud ni Amelia sa paghitangka niya sa pultahan.

"Ayaw na lang, Mel, anhi na lang ko dinhi."

"Na, hala, lingkod hinuon diha," dayong tunol sa usa ka silya ug milingkod atbang sa lalaki. "O, kumosta man, tagsa ka ra man moanhi dinhi."

"Naunsa ka Amelia?" misinghag si Iyo Pedring dayong lingkod sa bakanteng silya sa tupad sa lalaki, "imo nang paanhion nga daghan kaayo nang darohonon sa ilang uma?"

Ingon niana ka-istrikto si Iyo Pedring. Unya, usa ka buntag niana, nagpaninggit si Iyo Pedring sa labihang kasuko.

"Ngano ka diha Pedring -- nga sayo ka man nga nagyawyaw?"

"Wa ka diay masayud nga wa mouli si Adora kagabii? Karong buntag sa akong pag-adto sa tindahan ni Kulas, maoy misugat nako ang balita nga nagtaban kono ang imong anak nga si Adora ug si Tirso padulong sa siyudad."

"Mirisi," tubag sa iyang asawa, "mao nay resulta sa imong ka-istrikto sa imong mga anak."

"Amelia," gitawag niya ang magulang, "adtoa si Dario ug paanhia kay magsabot mi sa inyong kasal."

"Unsa goy kasal, Tay, nga wa pa gani na kasulti si Dario nako kay naa ka pirme sa iyang tupad kun moanhi siya."

"Uy, Pedring," matud ni Adela, iyang asawa, "ayaw pakauwaw sa atong mga silingan. Nahitabo na man na, hulata si Adora nga mouli ug ipakasal dayon."

Wala na lang magtingog si Iyo Pedring nga mikuha sa garapon sa tuba, dayong inom. (Katapusan)