Natental gyod si Tasya

Sa sityo Kintaka nga sakop sa lungsod sa Binawbaw, si Tasya ang giilang labing guwapa. Pero wa lang siya’y igong grado, nakahuman lang siya sa elementarya. Tungod sa kapobre sa iyang mga ginikanan nga si Noy Jose ug Nang Elang, wa na siya makapadayon sa haysikol sa lungsod. Miabag na lang si Tasya sa pag-uma sa iyang mga ginikanan nga dunay gamay'ng luna nga gitamnan og lainlaing matang sa mga utanon. May binuhi sab silang pipila ka kanding ug mga manok.

"Unsa ning akong nadungog, Tasya, nga naibog nimo kanang tiguwang nga balikbayan sa lungsod? Gipatawag ni Noy Jose ang anak. Nag-atubang sila sa ilang balkon uban kang Nang Elang.

Mikatawa si Tasya.

"Mao lagi. Pero katiguwang na niya, uy. Nagkangukango na."

"Sagdi lang god, Tasya. Ang importante mahaw-as ta sa kalisod. Dako ra ba kuno’g pensyon nang tawhana." Dasig ni Nang Elang.

Nag-edad nagduol sa sitenta ang balikbayan nga si Noy Amador, samtang si Tasya nagpanuigon og bayinte uno. Nagkaila sila dihang usa ka higayon milugsong si Tasya sa lungsod, nagpalit og buwad, asin ug kamay sa merkado para sa ilang panimalay.

"Di ko, Nay, uy!" Mitukikig katawa si Tasya.

Usa ka hapon, namisita si Noy Amador kang Tasya. Napugos sa pag-atubang ang dalaga sa tigulang. Sa balkon sila nagsultihanay.

Buhatan tika’g nindot nga balay, Tasya, kun magpakasal ka nako. Patiponon nato’g puyo ang imong mga ginikanan." Naghangos si Noy Amador kay mihuot ang iyang dughan nga nagtan-aw kang Tasya nga bigot kaayo’g mga paa.

"Di lagi ko nimo, Noy Amador. Na, basig atakehon ka sa kasingkasing kon magdulog na ta." Kakataw-onon si Tasya.

"Di kana mahitabo, Tasya. Makahimo pa ko, uy! Lig-on pa ning tuhod ko!"

Ang tiguwang, manganti baya! Hilom nga nakaingon si Tasya.

Dihang nakapauli na si Noy Amador, gipakigsultihan si Tasya sa iyang mga ginikanan. Naghinam-hinam si Nang Elang ug Noy Jose.

"Nakadungog kami sa gisaad ni Amador, Tasya. Pakasli siya aron makapuyo ta’g nindot nga balay ug maharuhay ang atong pagpuyo," matud ni Nang Elang.

"Bitaw, Tasya. Matiguwang ka na lang, di gyud ka makapuyo og haruhay nga kahimtang,'' dugang sab ni Noy Jose.

Natental gyod si Tasya sa pagpakasal kang Noy Amador. Puwerteng kaon ug inom sa mga bisita sa balay nila ni Noy Jose ug Nang Elang human sa kasal.

Ug sa unang gabii sa bag-ong magtiayon, gipakita ni Noy Amador nga makahimo pa siya. Sa bugtong lawak sa balay manghigda si Tasya ug Noy Amador.

Apan nakatulog na lang si Tasya, wa gyoy nahimo si Noy Amador. Naluya na lang kini. Apan malipayon gihapon si Tasya kay paglabay sa duha ka bulan, duna na man silay bag-o ug nindot nga balay si Noy Amador. Gipatipon sab sa pagpuyo ang mga ginikanan ni Tasya. Bugtong anak lang si Tasya.

"Unsa na, nasayop ba kami si Jose, Tasya? Wa gyod. Haruhay kaayo ang imong pagpuyo," matud ni Nang Elang.

Igo lang mipahiyom si Tasya. Natental man tuod siya sa pagpakasal sa tiguwang nga balikbayan, apan wa siya magbasol. Haruhay na ang iyang pagpuyo uban sa iyang mga ginikanan. Ug mao kini ang iyang gipangandoy. Natuman gyod pinaagi kang Noy Amador nga nagkangukango na. (Kataposan)