Idlas ang katumanan sa gugma

“Mahimo bang magsulti ta?” May pagka-suplada ang appeal ni Bernadith nga nakig-atubang kang Lonia.

Giatangan siya niini sa iyang paggawas sa accounting department gikang nag-claim sa iyang tseke nga bag-o lang na-release.

“Nganong dili?” Nakasabot si Lonia nga mahinungdanon ang tuyo niini kaniya. Karon lang kini mihagad sa pagpakigsulti kaniya.

Nangita sila’g dapit nga magkasulti sila’g maayo. Miadto sila sa kantena sa publikasyon. Sa usa ka lamesa nga nahimutang sa suok nga bahin sa kan-anan mipahimutang sila. Wala sila mo-order og pagkaon. Nag-atbang sila sa pagpanglingkod. Nagmugtok ang nawong ni Bernadith.

“Unsay atong panagsultihan?” Sukit gilayon ni Lonia.

“Bahin kang Mike,” laktod nga tubag ni Bernadith.

“Ngano man diay ang bahin kang Mike?” Nagpatuso-tuso si Lonia. Apan may ideya na siya kun unsay tuyo ni Bernadith kaniya.

“Nakamatikod ko nga ingon sa misamot ang inyong closeness niining nanglabay nga pipila ka adlaw.”

“So what kun mao kanay imong naobserbahan? Unsa may imong concern? May daotan ka bang nakita sa akong pagpakigsuod kang Mike?”

“Gusto lang kong masayod sa real score bahin ninyo.”

“Sa unsang katarongan?”

“Duna lang koy gustong klarohon. Gusto kong sultihan ko nimo sa matuod.”

“Well, tug-anan ko ikaw sa tinuod. Boyfriend ko na si Mike.”

“U-unsa?” Namula ang nawong ni Bernadith. - Sumpayan pa