Apan wala siya’y laing kaduolan mao nga napugos siya sa pagpabaga sa iyang nawong. Gipasabot niya si Atty. Gumera bahin sa kahimtang sa iyang mga manghod nga atua sa ospital.
Sama sa una niyang paghangyo og pabor niini, gipabungat siya sa iyang agalon sa kantidad nga iyang gikinahanglan.
“Mga P10,000 tingali, Atorni,” matud ni Rosalinda.
“Paigo na kaha na?” Sa abogado.
Wala siya motingog.
Misulod si Atty. Gumera sa lawak niini. Paghibalik niini sa sala, nagdala na kini sa kuwartang gikinahanglan ni Rosalinda alang sa masakiton niyang mga manghod. Giihap niini sa atubangan ni Rosalinda ang kuwartang tinibuok nga usa ka libo nga mikantidad og napulo ka libo ka pesos.
“Sultihi lang unya ko kon kuwang pa kana,” nagkanayon si Atty. Gumera.
Sa laing higayon, natabangan ni Atty. Pomposo Gumera si Rosalinda. Nasulbad ni Rosalinda ang iyang suliran sa panalapi gumikan sa panabang sa iyang agalon. Nagpasalamat si Rosalinda nga wala mobalibad ang iyang agalon sa iyang gihangyo niini. - Sumpayan pa