Ungo nga nindot kaayo'g tingog

Dinhi sa balangay sa Tubig-Lana dunay usa ka ulitawo nga nindot kaayo’g tingog sa higayon nga mokanta kini. Ugaling lang kay gamay ra intawon og kaalam. Espoko mo nang segundo grado ra man ang naabot niining maong ulitawo.

Ang iyang pangalan mao si Butig, anak sa magtiayong Tasya-Dadoy nga otro pong mga burong kaayo kay walay mga grado. Ang magtiayon diha lang magpakabuhi sa pagpangahoy og mga layang palwa sa lubi ug uban pang mga matang sa kahoy nga angay lang gyud isugnod sa abohan. Ang ilang makuhang mga kahoy ilang bugkoson sa tag-walo ka buok ang sulod sa usa ka binugkos ug ila kining dad-on sa tindahan ni Inse Miyat ug dili pud dayon dugaydugayon ni Inse Miyat pagbayad ang mga kahoy kay lagi maluoy siya sa magtiayon nga wala gyu’y hibangkaagan gawas niining matanga sa panginabuhi nga mao ang pangahoy.

Maong naliwat pud nila si Butig nga manginhas lang pud sa hunasan aron dunay ikabaligya ug ang sobra ilang sud-anon. Ug sa pagkahilomon ug pagka-burong ni Butig may usa ka dalaga nga naibog ug kini mao si Belinda, ang pag-umangkon ni Inse Miyak. Guwapa kini si Belinda ug daghang nahibulong nganong magsunodsunod siya kang Butig ug siya gyud ang mouna sa pagtimbaya niini ug hangtod magkabildohay sila.

“Uwaw kaayo ko nimo, uy Ma’am,” ni Butig pa nga mora’g dili kaayo moharong og tan-aw kang Belinda. “Guwapa kaayo ka ug unya dato pa gyud...”

“Sus, baya na siya, ayaw lang gud og kauwaw nako, Butig, kay ganahan gyud kong makigtabi nimo. Nindot sad kaayo ka’g tingog, uy. Di ba mokanta ka mag mga binisaya? Adtong usang semana ikaw man gani ang midaog sa tigiay sa awit sa “Sing-A-Long Contest” didto sa sityo Subang...” may pahiyom sa mga ngabil ni Belinda.

“Taghap lang to, Ma’am, uy,” ni Butig pa. “Binisaya ra may akong antigohan sa pagkanta, di man ko kamaog iningles kay dili ko maayo molitok niini.”

“Dili na importante, uy, Butig, ang importante nga nindot ka’g tingog,” pahayag ni Belinda.

“Kining, Ma’am di ka mahadlok og ungo?” ni Butig pa nga mitan-aw na sa guwapang nawong ni Belinda.

“Mahadlok ko, uy, kakuyaw anang ungo, mangaon man nag tawo,” medyo hinay ang ganay sa tingog sa dalaga.

“Kami, Ma’am, kaliwat man mi’g ungo. Pero dili mi mangaon og tawo, mosuyop lang mi og dugo sa mga hayop sama sa baboy, baka, kanding, manok ug uban pa.”

“Ha-ha, ungooo mooo Kakuyaw gud,” nanlimbawot ang balhibo ni Belinda ug wala siya magdugay pagpakighinabi kang Butig nga naglingkod sa may lubing naluad sa daplin sa baybayon.

Dugay nang wala sila magkita si Belinda ug Butig. Unya, may buot makigminyo kang Belinda ug kini mao si Freddie, usa sa mga anak sa giilang sapian sa sityo Habolhabol. Gisugot ni Belinda si Freddie aron lang malimot siya kang Butig. Dili niya hinigugma si Butig apan hilom niya kining gimahal bisan og anak kini’g pobreng mga ginikanan. Dili niya igsapayan ang kakabos niini apan nahadlok siya sa gisulti niini nga kini usa ka ungo, mangtas nga ungo.

Human sa kasal pagkagabii didto na sila si Belinda ug Freddie sa ilang lawak. Gihubo ni Belinda ang iyang sapot atubangan ni Freddie aron sugdan na nila ang buhat sa bag-ong magtiayon. Dihang gakson na unta ni Freddie si Belinda kalit lang may miawit didto sa silong ug si Belinda mora’g gibatobalani sa tingog. Tingog kini ni Butig. Ug milakaw si Belinda nga hubo ang lawas paingon sa silong ug didto gisugat siya ni Butig. Wala makalihok si Freddie nga nagtan-aw kang Belinda nga mikuyog kang Butig sa sum-ok sa kangitngit. (Kataposan)