Idlas ang katumanan sa gugma

 Gula 78

Gikalipay kini ni Lonia sa hilom. At least, mora’g naka-recover na siya gikan sa depression ug emotional problems. Andam na siyang moatubang sa umaabot uban ang pagsalig. Mao nay iyang hatagan og pagtagad ang iyang career ug ang relasyon nila ni Mike.

Ingon sa may milagrong nahitabo sa kasingkasing ni Lonia. Tungod sa gipakitang kabuotan ni Mike, nakakat-on siya sa kadugayan sa paghigugma niini. Malipayon siya sa ilang relasyon.

Wala gayod siya masayop sa iyang desisyon pagdawat sa gugma ni Mike bisan wala siya mahigugma niini sa sinugdan. Namatud-an niya nga katudloan diay ang kasingkasing nga mahigugma sa tawo nga angay gayod nga higugmaon.

Wala siya magbasol sa pagpakigrelasyon niya kang Mike. Responsable, masinaboton ug mapinanggaon si Mike. Gentleman kaayo kini, butang nga nakapasamot sa paghigugma niya ngadto niini. Iyang nabatyagan nga hingpit nang gipanag-iya ni Mike ang luna sa iyang kasingkasing nga kaniadto giokupar ni Rev.

Matag Domingo mag-uban gayod sila sa pagpanuroy. Manimba sila, mangaon sa gawas, mag-malling ug manan-aw og sine. Pagkahuman, ihatod na siya ni Mike sa iyang gipuy-an sa Tisa.

Nasuta ni Lonia nga dako kaayo ang respeto ni Mike sa iyang pagka-babaye. Bisan kausa wala gayod siya makamatikod nga naghimo kini’g attempt sa pag-take advantage kaniya sa higayon nga sila rang duha. Dinhi misamot ang pagdayeg ni Lonia kang Mike. -- Sumpayan pa