Komusta ka, Fred?" "Ha! Kinsa man to ka?" Kalit nga nahingangha si Fredo. "Para dose anyos lang ang miagi, nakalimot ka na?" "Sus! Si Mila man diay ni. Wa gyud ko kaila nimo, Mil, kay nitambok ka man og maayo. Hinuon misamot ka og kaguwapa. Hain man ang imong bana?"
"Wa man ko maminyo Fred kay wa man madayon ang among kasal kay sa pag-abot ni Papa gikan sa Manila, nailhan man niya si Dante nga mangingilad diay."
"Unya, kinsa man ning bata nga imong kuyog?"
"Ako ning pag-umangkon, Fred."
"Unya, hain man ron mopuyo kay mamisita ko?"
"Tua na ron mi sa Consolacion, Fred, kay nakapalit man si papa og gamay nga yuta didto. Pero, patay na sila si papa ug mama, busa ako nalang ang nahibilin didto."
"Diin man dapita kay moadto ko, una ko mobalik sa Dubai."
"Kun imo na lang gyud kong ihatod ron."
"Na, hala sige. Mag-grocery una ta kay adto ko maniudto sa inyo."
"Maayo na lang kay wa ka pa maminyo, Fred, abi ko'g di na gyud ta magkita."
"Unsaon nako pagka-minyo nga ikaw man ang kanunay nga nia sa akong hunahuna. Bisan nahiubos ko sa sulti ni mama mo niadto nga libod-suroy ra ko, ikaw man gyud ang akong mahal," dayong gunit ni Fredo sa kamot ni Mila sa pagsulod nila sa grocery.
"Kadaghan god ining imong gipamalit, Fred?" matud ni Mila sa ilang pagpanggawas.
"Aw, way problema niana, kay kun di ka kahurot niining mga gipamalit nato, tabangan ta ni og kaon hangtod mobalik ko sa Dubai," ni Fredo nga nagkatawa.
Nag-taksi sila hangtod sa Lacion ug pag-abot nila sa balay, nangaon una sila.
"Day, pagpalit una didto og soft- drinks," ni Mila pa sa iyang pag-umangkon.
Sa pagkanaog gyud sa bata, gigakos dayon ni Fredo si Mila ug gihagkan ang mga ngabil niini. "Anhi ko matulog unyang gabii," mihunghong si Fredo.
"Oo, Fred. Sayosayo og uli kay magluto ko og lamiang pagkaon alang nimo," dayong gakos ni Mila sa lalaki. (Katapusan)