Gula 74
Wala nay laing nalitok si Lonia gawas sa ngalan sa ulitawo. Misugwak na sa iyang dughan ang kalipay. Sukad karon pa niya ma-feel nga may binuhat nga naghatag og dakong importansiya kaniya.
Kaniadto gibati niya nga gihatagan siya’g dakong importansiya ni Rev, dili isip usa ka special someone, kondili isip usa ka higala ug kauban sa buhat. Lahi sa pagtratar ni Mike kaniya nga ingon sa espesyal gayod siya alang sa ulitawo tungod kay giuban man siya sa mga pangandoy niini.
“Mosamot pa tingali ang kamabulokon sa akong kinabuhi, Lonia, kun...kun dawaton mo ang akong gugma.”
Wala makatingog si Lonia. Naghinuktok siya sa gisulti ni Mike. Lisod alang kaniya ang pagdawat sa gugma ni Mike tungod kay iyang natugkad nga wala siya’y pagbati alang sa ulitawo. Dili niya katugbangan og gugma ang pagmahal ni Mike kaniya. Hinigala lang ang iyang pagtagad ngadto niini.
Miabot ang giorder nilang mga pagkaon. Nangaon dayon sila human ikapahimutang sa waitress ang maong pagkaon sa ibabaw sa lamesa nga ilang giokupar.
“Hangtod ba karon, Lonia,” namulong si Mike samtang nagpadayon sila sa pagpangaon,” wala ka pa gihapon makadesisyon bahin sa akong proposition?”
“Nganong ako man gyud, Mike?” Sukit ni Lonia. “Nganong dili man si Bernadith ang imong gipangulitawhan? Nasayod kong dako siya’g gusto nimo.” -- Sumpayan pa