Samtang naghapyudhapyod si Josh sa bag-o niyang dalang hiniktan, gikan sa Negros, miduol kaniya si Iyo Bastian, ang amahan ni Nelia, nga iyang kataligngan. Wala man gud maglagyo kaayo ang ilang mga balay.
"Bag-o na sab nang imong hiniktan, Josh?" nangutana si Iyo Bastian kang Josh, samtang nagsigi og tutok sa hiniktan.
"Oo Yo. Dala ko kini gikan sa Negros. Hinatag kini sa akong uyoan, nga usa sa mga breeders didtong dapita.
"Unsa man, nakaagi na kana?" Midason sa pagpangutana ang tiguwang. Dayon og tupad kang Josh sa paglingkod.
"Matud pa sa akong uyoan, kaupat na kini makabuno ug nakampiyon pa gani ni sa derby," maoy tubag ni Josh. Ug mipuno kini sa pag-ingon. "Gipadala bitaw na kanako sa akong uyoan, kay anhi niya paliwata."
Gikuha una ni Iyo Bastian ang manok gikan kang Josh, unya, miingon kini, "Kaayo unta og makapaliwat ta niining manoka. Kanindot ra ba nga pagka Talisayon!"
"Ngano gud nga dili. Ikaw na gud na," daling nakatubag si Josh. Nakaingon man gud siya sa iyang kaugalingon, nga dili maayong balibaran ang tiguwang. Amahan ra ba ni sa babaye nga iyang naibgan. Nga mao si Nelia.
"Maayo hinuon. Tua ra ba say akong baye nga maayo’g kaliwat," nahimuot kaayo ang tiguwang tungod sa gisulti ni Josh. Naibog man gud kaayo siya sa Talisayon ni Josh.
Alang kang Josh, dako kaayong bentaha alang kaniya ang pagsugot niya nga mopaliwat sa iyang manok ang amahan sa babaye nga maoy nakabihag sa iyang kasingkasing.
Human sila magkaestoryahay pag-ayo, gipasaligan dayon ni Josh si Iyo Bastian, nga iyang dad-on ngadto sa balay niini ang iyang Talisayon. Dad-on niya kini, inigkahapon gayud.
Mao man guy ilang sabot, nga adto lang una paestra sa balay sa tiguwang ang Talisayon ni Josh. Aron magkaduol gayud kini pirme ug ang baye ni Iyo Bastian.
Lakip sa ilang gisabutan, nga paghatdan lang kini kanunay ni Josh og patuka. Ug gani, mipasalig usab si Josh nga siya na lang ang mopatuka sa iyang manok. Ilabi na kay manglabok ra ba kini, ug kusog kaayong manuhak.
Sukad lang mahiadto ang Talisayon ni Josh sa ila kang Iyo Bastian, wala na say palta ang ulitawo sa pag-adto sa balay niini. Siya man guy mangunay sa pagpatuka sa iyang manok. Hangtod na gani sa pagpainom niini.
Kanunay na usab silang magkakita si Nelia. Ug pirme pa gani silang magkestoryahay, ilabi na kun maatol nga wala diha si Iyo Bastian. Sila man lang gud si Nelia ug si Iyo Bastian maoy nagpuyo sa ila. Sukad lang mamatay ang inahan sa dalaga.
Sa kadugayan, nagkauyab ra gayud si Josh ug si Nelia. Hinuon, ila lang gyud nga gililong kang Iyo Bastian ang ilang relasyon. Nagmata lang gani og buntag ang tiguwang sa mga panghitabo diha sa sulod sa ilang panimalay, nga may kalambigitan sa iyang anak ug kang Josh.
Usa ka higayon niana, may gitug-an si Nelia kang Josh. Maoy iyang gitug-an sa ulitawo, nga wala na gyud siya reglaha. Ug mamatngonan na niya pirme, ang paglihok sa usa ka kinabuhi diha sa iyang sabakan.
Inay mabalaka, mora hinuon og nahimuot kaayo si Josh. Nakaingon gani siya sa iyang kaugalingon nga, naunhan hinuon ni Nelia ang ilang dumagang manok. (Kataposan)