Tungang gabii na sa pagkahuman ni Alex og sulat sa iyang sugilanon alang sa Banat News. Tungod sa kakapoy, mihuyatid una siya, dayon niyang kanta. "Irog ako sa'yoy paalam. Di ko alam ang tutunguhan, hahanapin koy kamatayan. Pagkat walang nagmamahal."
"Matulog ka na, Lo," matud sa iyang apo nga ulitawo nga mao ray ilang kauban ug sa iyang asawang masakiton. "Gikapoy ka na tingali og maayo sa pagsinuwat."
"Nagmata ka pa diay?'
"Ganiha ra man kong nagmata sa hinagtok sa imong makinilya."
Gihipos ni Alex ang iyang mga gamit aron matulog na kay mobangon pa ra ba siya sa alas dos sa kaadlawon aron ipadayon ang iyang pagsulat.
Nahinumdom siya sa bag-o pa silang nagkaila si Eden.
"Ako ang mipili sa akong asawa, Eden, ug hangtod karon, mahal ko pa gihapon siya. Apan wala na kami sex-contact sanglit lima ka tuig na siyang maysakit. Ug sa dihang naka-ila ko ikaw, tawo lang ako nga masulob-on ug walay kalipay nga mibati og paghigugma kanimo."
"Unsaon na man lang ang imong asawa?"
"Dili ko kahimo sa pagbiya sa akong asawa, apan sanglit siya masakiton, kun ugaling muabot ang panahon nga kuhaon na siya sa atong Magbubuhat, ikaw na ang akong ipuli diri sa luna sa akong kasingkasing."
Dugay na kadto, wala na mahinumdom si Alex kun pila na ka bulan ang milabay sukad nga wala na sila magkasulti o magkita si Eden. Mahal niya si Eden, apan kun unsa ang hinungdan sa ilang panaglagyo, butang nga wala niya hisabti.
Kun magkita man ugaling sila, dili usab siya maka-una pagtagad, sanglit maulaw siya kun dili siya tagdon niini. Giluom na lang niya ang tanan.
"Lanie," matud ni Alex sa usa niya ka higala nga higala usab ni Eden, "Just tell Eden I still love her. If I could have a mountain made of gold, and diamonds like stars above, the treasure I would most be longing for, would be the treasure of her love."
Natulog si Alex nga balon ang paglaum nga usa ka adlaw niana, moabot ug mobalik si Eden kaniya. (Katapusan)